ស្ថាប័នធំៗរបស់រដ្ឋាភិបាលចំនួនបីប្រកាសរួមគ្នារំឭកកុំឱ្យសាធារណជនចូលរួមទិញឬដាក់ ទុនក្នុងការចរាចរកាសអេឡិចត្រូនិចមួយចំនួន ហើយបានព្រមានចាត់វិធានផ្លូវច្បាប់ទៅលើ ក្រុមហ៊ុន ឬភ្នាក់ងារចែកចាយទាំងនេះ។
សេចក្តីថ្លែងការណ៍រួមរបស់ធនាគារជាតិកម្ពុជា គណៈកម្មការមូលបត្រកម្ពុជា និង អគ្គស្នងការដ្ឋាននគរបាលជាតិ ចេញផ្សាយនៅថ្ងៃទី១១ខែឧសភា បានបញ្ជាក់ថា កាស អេឡិចត្រូនិចដូចជា KH Coin, Suncoin, K coin, One-coin, Forex Coin និង កាសអេឡិចត្រូនិចប្រហាក់ប្រហែលមួយចំនួនទៀត កំពុងផ្សព្វផ្សាយ ចរាចរ ទិញ លក់ នៅកម្ពុជា ។
ស្ថាប័នទាំងបីបញ្ជាក់ថា ចរាចរ កាសអេឡិចត្រូនិចទាំងនេះ មិនមានការអនុញ្ញាតពីស្ថាប័នពាក់ព័ន្ធនេះទេ។
ស្ថាប័នទាំងបីអំពាវនាវឱ្យសាធារណជនមានការប្រុងប្រយ័ត្នចំពោះបញ្ហានេះ ព្រោះអាចខាតបង់ថវិកា និង ជួបគ្រោះហានិភ័យផ្សេងៗទៀត។