ក្រសួងការងាររបស់ថៃចាប់ផ្តើមរឹតបន្តឹងលើប្រជាពលរដ្ឋដែលមានបំណងទៅធ្វើការងារនៅក្រៅប្រទេសពិសេសកូរ៉េខាងត្បូង ដោយសារមានអ្នកបន្លំខ្លួនទៅធ្វើការងារទីនោះខុសច្បាប់កើនឡើងហើយអាចប្រឈមវិធានការផ្សេងៗរបស់ម្ចាស់ប្រទេស។
តាមការចុះផ្សាយរបស់សារព័ត៌មានបាងកកប៉ុស្តិ៍កាលពីម្សិលមិញឱ្យដឹងថា ក្រសួងការងារបានណែនាំដល់មន្ត្រីនៅតាមច្រកព្រំដែន និងនៅតាមព្រលានយន្តហោះត្រូវបង្កើនការត្រួតពិនិត្យលើឯកសារផ្សេងៗរបស់ពលរដ្ឋថៃដែលធ្វើដំណើរទៅប្រទេសកូរ៉េខាងត្បូង។
របាយការណ៍ក្រសួងការងារថៃបង្ហាញថា ពលរដ្ឋថៃប្រមាណ១៤០ ០០០នាក់ កំពុងតែធ្វើការងារខុសច្បាប់នៅក្នុងប្រទេសកូរ៉េខាងត្បូង។
បច្ចុប្បន្នពលរដ្ឋថៃប្រមាណ១០០ទៅ១៥០នាក់ក្នុង១ថ្ងៃ ធ្វើដំណើរទៅដល់ប្រទេសកូរ៉េខាងត្បូង ហើយត្រូវអាជ្ញាធរកូរ៉េខាងត្បូងបញ្ជូនត្រលប់មកវិញដោយរកឃើញពួកគេមានបំណងទៅធ្វើការងារដោយខុសច្បាប់នៅទីនោះ។ ពលរដ្ឋថៃទាំងនោះបំពេញក្នុងសំណុំឯកសារថា ទៅទទួលការបណ្តុះបណ្តាលវគ្គខ្លីៗ ប៉ុន្តែសមត្ថកិច្ចកូរ៉េខាងត្បូងរកឃើញថា ភាគច្រើននោះជាមូលហេតុក្លែងក្លាយ។
ពលរដ្ឋថៃដែលស្វែងរកការងារធ្វើនៅប្រទេសកូរ៉េខាងត្បូងដោយសារតែពួកគេចង់បង្កើនប្រាក់ចំណូលគឺនៅទីនោះពួកគេអាចរកបានជាមធ្យមប្រមាណ២០០០ដុល្លារអាមេរិកក្នុង១ខែ។
ប៉ុន្តែក្រសួងការងារថៃរកឃើញថា ពលរដ្ឋធ្វើការងារខុសច្បាប់ទាំងនេះ ប្រឈមបញ្ហាផ្សេងៗច្រើនដូចជា ការចំណាយក្រៅផ្លូវការច្រើនលើអ្នករត់ការ និងប្រឈមវិធានការផ្លូវច្បាប់របស់កូរ៉េខាងត្បូងជាដើម។