សមត្ថកិច្ចរាជធានីភ្នំពេញបង្ក្រាបក្លិបមួយ ឈ្មោះ លុច្សសារី ហើយឃាត់ខ្លួនអ្នកទៅកម្សាន្តប្រមាណ៤០០នាក់ ភាគច្រើនជាជនជាតិចិន និងវៀតណាម សង្ស័យពាក់ព័ន្ធករណីគ្រឿងញៀន។
តាមការចុះផ្សាយរបស់អគ្គស្នងការដ្ឋាននគរបាលជាតិ គឺលោក ស ថេត ស្នងការនគរបាលរាជធានីភ្នំពេញ សហការជាមួយមន្ត្រីពាក់ព័ន្ធ ចុះបង្ក្រាបនៅម៉ោងប្រមាណ ៤ទាបភ្លឺ ថ្ងៃទី៨ ខែមិថុនា ឆ្នាំ២០១៩។ ក្លិបនេះស្ថិតនៅតាមបណ្ដោយផ្លូវលេខ២១៤ កែងផ្លូវ៦៣ សង្កាត់បឹងរាំង ខណ្ឌដូនពេញ។
សមត្ថកិច្ចបានរកឃើញគ្រឿងញៀនមួយចំនួន ហើយឃាត់ខ្លួនអ្នកទៅកម្សាន្តប្រមាណ៤០០នាក់ ដើម្បីយកទៅសាកសួរ។ សមត្ថកិច្ចបញ្ជាក់ថា អ្នកទៅកម្សាន្តហើយត្រូវឃាត់ខ្លួនទាំងនេះភាគច្រើនជាជនជាតិចិន និងវៀតណាម។
កាលពីថ្ងៃទី២៣ ខែកុម្ភៈ សមត្ថកិច្ចរាជធានីភ្នំពេញក៏បានបង្ក្រាបក្លិបកម្សាន្តរ៉ក់ ឃាត់ខ្លួនមនុស្សជាង៣០០នាក់ និងរកឃើញគ្រឿងញៀនប្រមាណ៥០គីឡូក្រាម៕
