លោកនាយករដ្ឋមន្រ្តី ហ៊ុន សែន បានសម្រេចតែងតាំងសមាសភាពអង្គភាពអ្នកនាំពាក្យ ចំនួន ៣០រូប នៅតាមក្រសួងស្ថាប័ននានារបស់រាជរដ្ឋាភិបាល ដែលមានលោក ផៃ ស៊ីផាន ជាប្រធាន។
ក្នុងសេចក្ដីសម្រេចចុះថ្ងៃទី១០ ខែមិថុនា ឆ្នាំ២០១៩ លោកនាយករដ្ឋមន្ត្រី ហ៊ុន សែន បានតែងតាំងសមាសភាពអង្គភាពអ្នកនាំពាក្យរដ្ឋាភិបាលចំនួន ៣០រូប។ ក្នុងសេចក្ដីសម្រេចនេះ បានតែងតាំងលោក ផៃ ស៊ីផាន ដែលមានតួនាទីបច្ចុប្បន្នជារដ្ឋមន្ត្រីប្រតិភូអមនាយករដ្ឋមន្ត្រី ជាប្រធានក្រុមអ្នកនាំពាក្យ។
ចំណែកអនុប្រធានក្រុមអ្នកនាំពាក្យមាន ៤ រូប គឺលោក ឯក ថា អ្នកនាំពាក្យទីស្តីការគណៈរដ្ឋមន្ត្រី, លោក ខៀវ សុភ័គ អ្នកនាំពាក្យក្រសួងមហាផ្ទៃ, លោក ឈុំ សុជាតិ អ្នកនាំពាក្យក្រសួងការពារជាតិ និងលោក កេត សោផាន់ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ។
ដោយឡែក សមាជិកអ្នកនាំពាក្យនៅតាមក្រសួងស្ថាប័នផ្សេងទៀតមានចំនួន ២៥រូប។ សេចក្ដីសម្រេចបញ្ជាក់ថា សមាសភាពអង្គភាពអ្នកនាំពាក្យទាំងអស់ត្រូវទទួលបន្ទុកអនុវត្តភារកិច្ចរបស់ខ្លួនចាប់ពីថ្ងៃទី១០ ខែមិថុនា ឆ្នាំ២០១៩។