រដ្ឋសភានៅថ្ងៃនេះ បានអនុម័តសេចក្តីព្រាងច្បាប់ស្តីពីការគ្រប់គ្រងប្រេងកាត និងផលិតផលប្រេងកាត ដោយសំឡេង១០៨ លើ១០៨។
តាមការចុះផ្សាយលើគេហទំព័រដ្ឋសភា សេចក្តីព្រាងច្បាប់នេះ មានសារៈសំខាន់ក្នុងការ ចាត់ចែង គ្រប់គ្រង ប្រើប្រាស់ធនធានប្រេងកាត ដើម្បីអភិវឌ្ឍសេដ្ឋកិច្ច និងលើកកម្ពស់ជីវភាពប្រជាពលរដ្ឋ។ប្រភពដដែលឲ្យដឹងថា សេចក្តីព្រាងច្បាប់ស្តីពីការគ្រប់គ្រងប្រេងកាត និងផលិតផលប្រេងកាត មាន៩ជំពូក និង៧២មាត្រា។ ច្បាប់នេះ ត្រូវបានកែសម្រួលបន្ថែមដោយបញ្ចូលបរិបទថ្មីៗ មួយចំនួន ផ្អែកលើបទពិសោធន៍ នៃបណ្តាប្រទេសផ្សេងៗ ដូចជាប្រទេសន័រវ៉េស អូស្រ្តាលី ជប៉ុន ឥណ្ឌូណេស៊ី ថៃ វៀតណាម ទីម័រខាងកើត ម៉ាឡេស៊ី និងប្រ៊ុយណេ ជាដើម។
កម្ពុជា បានសិក្សាស្រាវជ្រាវលើធនធានប្រេងកាតតំាងពីអំឡុងទសវត្សរ៍ទី៦០មកម្ល៉េះ ប៉ុន្តែដោយសារតែមានសង្រ្គាមជាបន្តបន្ទាប់ ការរុករក និងសិក្សាស្រាវជ្រាវត្រូវបានអាក់ខាន រហូតដល់ឆ្នាំ១៩៨៧ ទើបសកម្មភាពស្វែង រុករកធនធាន ត្រូវបានចាប់ផ្តើមឡើងវិញ។
បើតាមការចុះផ្សាយលើគេហទំព័រដ្ឋសភា ចាប់តំាងពីដើមទសវត្សរ៍ទី៩០ សកម្មភាពស្វែងរុករកធនធានប្រេងកាតត្រូវបានធ្វើឡើងជាបន្តបន្ទាប់ ដោយក្រុមហ៊ុន អន្តរជាតិនានាដូចជាក្រុមហ៊ុន ឈេហ្វរ៉ុន ដែលបានប្រកាសរកឃើញធនធានប្រេងមានលក្ខណៈពាណិជ្ជកម្មនៅក្នុងប្លុកអេ ដែនសមុទ្រកម្ពុជា នៅឆ្នាំ២០១០។ បច្ចុប្បន្នប្លុកប្រេងកាតនេះ គ្រប់គ្រងនឹងឈានដល់ការធ្វើផលិតកម្មដោយក្រុមហ៊ុនគ្រីសអេនីជី នាពេលឆាប់ៗខាងមុខនេះ។ រាជរដ្ឋាភិបាល បានតាក់តែង សេចក្តីព្រាងច្បាប់ស្តីពីការគ្រប់គ្រងប្រេងកាត និងផលិតផលប្រេងកាតនេះ តំាងពីឆ្នាំ១៩៩៦មកម៉្លេះ៕
