ស្ថានទូតកម្ពុជាអំពាវនាវឱ្យប្រជាពលរដ្ឋខ្មែរដែលកំពុងរស់នៅក្នុងប្រទេសជប៉ុន ចាកចេញឱ្យឆ្ងាយពីតំបន់មាត់សមុទ្រ ដោយសារតែនៅយប់ថ្ងៃទី១៨ ខែមិថុនាម្សិលមិញ មានគ្រោះរញ្ជួយដីកម្រិតខ្ពស់មួយអាចបង្កជារលកយក្សស៊ូណាមិ។
ក្នុងសេចក្ដីជូនដំណឹងរបស់ស្ថានទូយកម្ពុជាប្រចាំប្រទេសជប៉ុនចុះថ្ងៃទី១៨ ខែមិថុនា ឆ្នាំ២០១៩ លើកឡើងថា នៅវេលាម៉ោង ១០:២២ នាទីយប់ថ្ងៃទី១៨ ខែមិថុនា ឆ្នាំ២០១៩ មានគ្រោះរញ្ជួយដីក្នុងកម្រិតខ្ពស់រហូតដល់៦,៨ រិច្ឆទ័រ។ ស្ថានទូតបញ្ជាក់ថា គ្រោះរញ្ជួយដីនេះ អាចនឹងបង្កឱ្យរលកយក្សស៊ូណាមិ នៅតាមតំបន់ឆ្នេរនៃខេត្ត Yamagata ខេត្ត Niigata និងខេត្ត Ishikawa។
ករណីនេះ ស្ថានទូតអំពាវនាវទៅប្រជាពលរដ្ឋខ្មែរ សិស្ស/ និស្សិត និងសិក្ខាកាមខ្មែរទាំងអស់ នៅឱ្យឆ្ងាយពីតំបន់មាត់សមុទ្រ ហើយថា ប្រសិនប្រជាពលរដ្ឋរស់នៅក្នុងតំបន់នោះទទួលរងផលប៉ះពាល់អាចទាក់ទងតាមហ្វេសប៊ុក Royal Embassy of Cambodia In Japan និងលេខទូរសព្ទ 080 4689 9374 ឬ 080 3459 7889 ។