ក្រសួងធនធានទឹក និងឧតុនិយមបានបន្ដអំពាវនាវឲ្យប្រជាពលរដ្ឋបង្កើនការប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ដ្រាក់ ចាប់ពីថ្ងៃទី២០ ដល់ថ្ងៃទី២៦ ខែមិថុនា។
ក្នុងសេចក្ដីជូនដំណឹងនៅថ្ងៃនេះ ក្រសួងធនធានទឹក និងឧតុនិយមព្យាករថា ចាប់ពីថ្ងៃទី២០ ដល់ថ្ងៃទី២៦ ខែមិថុនានេះ ប្រទេសកម្ពុជានឹងមានភ្លៀងធ្លាក់ច្រើននៅតំបន់វាលទំនាប និងតំបន់មាត់សមុទ្រ និងបណ្ដាខេត្តនៅតំបន់ខ្ពង់រាបភាគខាងជើង និងឦសានផងដែរ ដែលថា អាចបង្កជាបាតុភូតផ្គរ រន្ទះ និងខ្យល់កន្ដ្រាក់។
ក្នុងសេចក្ដីជូនដំណឹងដដែលនោះ ក្រសួងធនធានទឹក និងឧតុនិយម ឲ្យដឹងថា ធ្លាក់ភ្លៀងច្រើន និងបាតុភូតធម្មជាតិនេះ គឺមកពីកម្ពុជាទទួលរងឥទ្ធិពលពីប្រព័ន្ធសំពាធទាប ដែលអូសបន្លាយលើប្រទេសឡាវ និងវៀតណាម ជាមួយនឹងរបបខ្យល់មូសុងនិរតីបក់ក្នុងកម្រិតមធ្យម។
របាយការណ៍គណៈកម្មាធិការជាតិគ្រប់គ្រងគ្រោះមហន្តរាយ ឲ្យដឹងថា រយៈពេល ៤ខែ ដើមឆ្នាំ២០១៩នេះ មានមនុស្សយ៉ាងហោចណាស់ ១៦នាក់បានស្លាប់ និងជិត ៤០នាក់ទៀតបានទទួលរងរបួស ដោយសារខ្យល់កន្ដ្រាក់ និងរន្ទះបាញ់ ហើយផ្ទះសម្បែងប្រជាពលរដ្ឋប្រមាណជាង ៣ពាន់ខ្នង និងដំណាំកសិកម្មផ្សេងៗទៀត ក៏រងការខូចខាតផងដែរ៕
