សហជីពមួយ បានរំលឹកទៅកម្មករសំណង់ទាំងអស់ ត្រូវមានការប្រុងប្រយ័ត្នមុនចូលទៅបំពេញការងារនៅក្រុមហ៊ុន ឬការដ្ឋានសំណង់ណាមួយ ដោយថា ដើម្បីជៀសវាងគ្រោះថ្នាក់ផ្សេងៗ។
ក្នុងសេចក្តីអំពាវនាវចុះថ្ងៃទី២៨ ខែមិថុនានេះ សហព័ន្ធសហជីពកម្មករសំណង់និងព្រៃឈើកម្ពុជា (BWTUC) បានអំពាវនាវទៅកម្មករ កម្មការិនីក្នុងវិស័យសំណង់ទាំងអស់ ត្រូវពិនិត្យមើលឲ្យល្អិតល្អន់មុនចូលទៅបំពេញការងារក្នុងការដ្ឋានសំណង់ដែលខ្លួនកំពុងធ្វើ ហើយត្រូវសហការ និងផ្តល់ព័ត៌មាន ប្រសិនបើពិនិត្យឃើញថា មានករណីអាចបង្ករហានិភ័យការងារ។
សហជីពមួយនេះ បានជំរុញឲ្យរាយការណ៍ជាបន្ទាន់ទៅអ្នកគ្រប់គ្រងក្រុមហ៊ុន ឬការដ្ឋានសំណង់ និងអាជ្ញាធរពាក់ព័ន្ធក្នុងមូលដ្ឋាន ដើម្បីមានវិធានការបញ្ចៀស និងទប់ស្កាត់គ្រោះថ្នាក់ផ្សេងៗដែលអាចកើតមានជាយថាហេតុ។
ការរំលឹករបស់សហជីពឲ្យកម្មករសំណង់មានការប្រុងប្រយ័ត្នចំពោះគ្រោះថ្នាក់ការងារនេះ ធ្វើឡើងបន្ទាប់ពីមានសោកនាដកម្មបាក់អគារកម្ពស់៧ជាន់មួយនៅខេត្តព្រះសីហនុ ដែលបណ្ដាលឲ្យកម្មករ២៨នាក់បាត់ជីវិត និង២៦នាក់រងរបួស៕
