រដ្ឋាភិបាលបានសម្រេចផ្តាច់ទឹកផ្តាច់ភ្លើង និងរួមទាំងផ្អាកការផ្គត់ផ្គង់លើផ្នែកមួយចំនួនទៀត ដល់ការដ្ឋានសំណង់ខុសច្បាប់ ដើម្បីធានាការពារអាយុវជីវិតមនុស្ស ទ្រព្យសម្បត្តិ សុវត្ថិភាព និងគុណភាពសំណង់ទូទាំងប្រទេស។
សេចក្តីសម្រេចរបស់ទីស្តីការគណៈរដ្ឋមន្ត្រីចុះថ្ងៃទី៥ខែកក្កដា បានណែនាំចំនួន៥ចំណុចរួមមាន ក្រសួងរ៉ែ និងថាមពល កុំឱ្យផ្គត់ផ្គង់ថាមពលអគ្គិសនី ក្រសួងឧស្សាហកម្មនិងសិប្បកម្មមិនឱ្យមានការផ្គត់ផ្គង់ទឹកស្អាត និងក្រសួងក្រសួងសាធារណការមិនឱ្យតភ្ជាប់ប្រព័ន្ធលូ។
ចំណែកវិធានការពីរទៀតគឺ ក្រសួងស្ថាប័នរដ្ឋ និងអង្គភាពមានសមត្ថកិច្ចមិនត្រូវផ្តល់លិខិតអនុញ្ញាត និង ចំណុចចុងក្រោយក្រសួងព័ត៌មានមិនត្រូវអនុញ្ញាតឱ្យម្ចាស់ការដ្ឋានទាំងនោះផ្សាយពាណិជ្ជកម្ម។
ក្នុងសេចក្តីសម្រេចនេះ បញ្ជាក់ថា មិនអនុវត្តន៍ចំពោះសំណង់ការដ្ឋានជាលក្ខណៈលំនៅឋានរបស់ប្រជាពលរដ្ឋនោះទេ។
រដ្ឋាភិបាលមានវិធានការជាបន្តបន្ទាប់ទាក់ទងគុណភាពសំណង់ ក្រោយហេតុការណ៍បាក់សំណង់អគារនៅខេត្តព្រះសីហនុកាលពីថ្ងៃទី២២ខែមិថុនា ដែលបណ្តាលឱ្យមានអ្នកស្លាប់២៨នាក់និងរងរបួសចំនួន២៦នាក់។
