រដ្ឋាភិបាលចិនកាលពីម្សិលមិញ បានជំរុញជាថ្មីទៅភាគីវៀតណាមឲ្យគោរពអធិបតេយ្យភាពរបស់ក្រុងប៉េកាំងទៅលើដែនសមុទ្រចិនខាងត្បូង។
ការអំពាវនាវរបស់រដ្ឋាភិបាលចិន ធ្វើឡើងស្របពេលដែលនាវាទាហានជើងទឹកប្រទេសមហាអំណាចមួយនេះ កំពុងប្រឈមដាក់គ្នាជាមួយនាវាទាហានជើងទឹកវៀតណាមនៅសមុទ្រចិនខាងត្បូងក្នុងតំបន់ដែលសម្បូរដោយធនធានប្រេងកាត។ ការប្រឈមមុខដាក់គ្នានេះ បានអូសបន្លាយអស់រយៈពេលមួយសប្តាហ៍មកហើយ បើយោងតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
អ្នកនាំពាក្យក្រសួងការបរទេសចិន លោក Geng Shuang បានថ្លែងក្នុងសន្និសីទសារព័ត៌មានប្រចាំថ្ងៃកាលពីម្សិលមិញថា ចិនសង្ឃឹមថា ភាគីវៀតណាមត្រូវគោរពសិទិ្ធនៃអធិបតេយ្យភាព និងយុត្តាធិការរបស់ចិនលើដែនសមុទ្រចិនខាងត្បូង។ ចិន ក៏បានស្នើឲ្យវៀតណាមកុំធ្វើសកម្មភាពណាមួយដែលអាចបង្កឲ្យកាន់តែស្មុគស្មាញថែមទៀត។
កាលពីថ្ងៃទី១២ ខែកក្កដា អ្នកនាំពាក្យក្រសួងការបរទេសចិនរូបនេះ ក៏បានឲ្យដឹងថា គោលជំហររបស់ចិនទៅលើបញ្ហាដែនសមុទ្រចិនខាងត្បួងគឺច្បាស់លាស់ និងមិនមានការប្រែប្រួលនោះទេ។ លោក បានមានប្រសាសន៍ថា ចិនប្តេជ្ញាយ៉ាងមុតមាំក្នុងការការពារអធិបតេយ្យភាព និងសិទ្ធិរបស់ខ្លួនលើដែនសមុទ្រចិនខាងត្បូង។ ប៉ុន្តែ លោក បានបញ្ជាក់ផងដែរថា ចិននៅតែរក្សាជំហរដោះស្រាយជម្លោះជាមួយប្រទេសជិតខាងជុំវិញបញ្ហានេះតាមរយៈការចរចា និងការពិភាក្សាគ្នា។
កាលពីថ្ងៃទី១៦ ខែកក្កដា ភាគីវៀតណាម ក៏បានចេញសេចក្តីថ្លែងការណ៍មួយផងដែរទាក់ទងនឹងស្ថានការណ៍នៅសមុទ្រចិនខាងត្បូង។ អ្នកនាំពាក្យក្រសួងការបរទេសវៀតណាម លោកស្រី Le Thi Thu Hang បានអះអាងថា ភាគីវៀតណាមបានលើកឡើងជាច្រើនលើកច្រើនសារមកហើយពីសិទិ្ធនៃអធិបតេយ្យភាព និងយុត្តាធិការរបស់ខ្លួនលើដែនទឹកក្នុងសមុទ្រចិនខាងត្បូង ដោយយោងទៅតាមអនុសញ្ញាអង្គការសហប្រជាជាតិឆ្នាំ១៩៨២ ពាក់ព័ន្ធនឹងច្បាប់សមុទ្រអន្តរជាតិ។
អ្នកនាំពាក្យក្រសួងការបរទេសវៀតណាមរូបនេះ បានលើកឡើងបន្តថា ការធ្វើសកម្មភាពណាមួយដោយភាគីបរទេសក្នុងដែនទឹករបស់វៀតណាមដោយគ្មានការអនុញ្ញាត ជាការឈ្លានពានអធិបតេយ្យភាពវៀតណាម និងជាការរំលោភច្បាប់អន្តរជាតិ ក៏ដូចជា អនុសញ្ញាអង្គការសហប្រជាជាតិឆ្នាំ១៩៨២ ពាក់ព័ន្ធនឹងច្បាប់សមុទ្រអន្តរជាតិផងដែរ។ មិនខុសគ្នាពីរដ្ឋាភិបាលក្រុងប៉េកាំងនោះទេ រដ្ឋាភិបាលក្រុងហាណូយ ក៏ស្នើឲ្យភាគីចិនគោរពនូវអធិបតេយ្យភាព និងសិទ្ធិស្របច្បាប់របស់វៀតណាមទៅលើដែនសមុទ្រចិនខាងត្បូង។
កាលពីចុងខែឧសភា ក្រុមសមាជិកព្រឹទ្ធសភាអាមេរិក បានស្នើជាថ្មីនូវច្បាប់ដាក់ទណ្ឌកម្មអ្នកដែលពាក់ព័ន្ធជាមួយប្រទេសចិន ក្នុងករណីរំលោភអធិបតេយ្យតំបន់កំពុងមានជម្លោះក្នុងសមុទ្រចិនខាងត្បូង និងខាងកើត។ ព្រឹទ្ធសមាជិកអាមេរិកដែលជម្រុញឲ្យមានច្បាប់នេះ គឺលោក លោក ម៉ាកូ រូប៊ីអូ (Marco Rubio) បានលើកឡើងថា ច្បាប់នេះនឹងដាក់ទណ្ឌកម្មប្រឆាំងបុគ្គល ឬក្រុមហ៊ុនណាដែលចូលរួមជាមួយរដ្ឋាភិបាលក្រុងប៉េកាំងក្នុងសកម្មភាពខុសច្បាប់នានា។ សកម្មភាពខុសច្បាប់ទាំងនោះរួមមាន ការរំលោភយកដែនកោះ ការបង្កើតកោះសិប្បនិម្មិត និងការកសាងហេដ្ឋារចនាសម្ព័ន្ធទូរគមនាគមន៍ចល័តក្នុងតំបន់ដែលកំពុងមានជម្លោះ ជាដើម។ ប្រសិនបើច្បាប់នេះចូលជាធរមាន រដ្ឋាភិបាលអាមេរិកនឹងដកហូតទ្រព្យសម្បត្តិរបស់បុគ្គល ឬក្រុមហ៊ុនចិនទាំងនោះ ឬបដិសេធការចេញទិដ្ឋាការឲ្យពួកគេចូលទឹកដីអាមេរិក៕
