កាស៊ីណូស្របច្បាប់នៅកម្ពុជាកើនឡើងដល់១៦៣កន្លែង

ក្រសួងសេដ្ឋកិច្ច និងហិរញ្ញវត្ថុ ឱ្យដឹងថា ការផ្តល់អាជ្ញាបណ្ណឱ្យឈ្មួញបើកកាស៊ីណូស្របច្បាប់នៅកម្ពុជាកើនឡើងដល់ ១៦៣កន្លែង គិតត្រឹមខែមិថុនា ឆ្នាំ២០១៩។ កំណើនអាជ្ញាបណ្ណកាស៊ីណូនេះ ត្រូវបានអ្នកឃ្លាំមើលបញ្ហា​សេដ្ឋកិច្ច និងសង្គម​យល់ថា អាចនឹងបណ្ដាលឱ្យមានផលប៉ះពាល់ទាំងវិជ្ជមាន និងអវិជ្ជមានលើផ្នែកសេដ្ឋកិច្ច និងសង្គមកម្ពុជា។

របាយការណ៍ពីអគ្គនាយកដ្ឋានឧស្សាហកម្មហិរញ្ញវត្ថុនៃក្រសួងសេដ្ឋកិច្ច និងហិរញ្ញវត្ថុ ដែលជានិយតករអាជីវកម្មកាស៊ីណូ ឱ្យដឹងថា សរុបចំនួនអាជ្ញាបណ្ណអាជីវកម្មកាស៊ីណូ ត្រឹមបំណាច់ខែមិថុនា ឆ្នាំ២០១៩ មានចំនួន ១៦៣កន្លែង។ អាជ្ញាបណ្ណកាស៊ីណូដែលត្រូវបានផ្ដល់ក្នុងរយៈពេល៦ខែដើមឆ្នាំនេះមានចំនួន ១៣ នៅទូទាំងប្រទេស ដែលកើនឡើងជិត ១០% បើធៀបនឹងឆ្នាំ២០១៨។

គោលនយោបាយសេដ្ឋកិច្ចកម្ពុជាទាក់ទាញទេសចរចិននាំឱ្យមានកំណើនកាស៊ីណូ

ម្ចាស់កាស៊ីណូ និងមន្ត្រីរដ្ឋាភិបាល សុទ្ធតែបានអះអាងថា កាស៊ីណូមានប្រយោជន៍សម្រាប់សេដ្ឋកិច្ច រួមមាន បង្កើនចំណូលជាតិ និងបង្កើតការងារ ជាដើម។

ដើមខែមេសា ​ឆ្នាំ២០១៩ ក្រុមហ៊ុន​ណាហ្គាខប (NagaCorp )​ បានប្រកាស​ថា ក្រុមហ៊ុននេះ គ្រោងនឹង​ធ្វើការអភិវឌ្ឍ​កាស៊ីណូ ​សណ្ឋាគារ ដើម្បីទាក់ទាញ​អ្នកលេងល្បែង​ជនជាតិចិន​ដែលកំពុង​សម្រុក​មកកម្សាន្ត​នៅប្រទេសកម្ពុជាឲ្យ​កាន់តែ​ច្រើនឡើង។

ក្រុមហ៊ុន NagaCorp បានចុះបញ្ជី​ផ្សារហ៊ុននៅហុងកុង គ្រប់គ្រង​ដោយមហា​សេដ្ឋីម៉ាឡេស៊ី​លោក Chen Lip Keong។ មហាសេដ្ឋីរូបនេះប៉ាន់ស្មានថា ខ្លួននឹង​ចំណាយ​ប្រាក់ចំនួន ៣ ទៅ ៨ពាន់លាន​ដុល្លារអាមេរិក​លើគម្រោង​ណាហ្គាទី៣​។ ម្ចាស់កាស៊ីណូណាហ្គា បញ្ជាក់ក្នុងសេចក្ដីប្រកាសព័ត៌មានរបស់ខ្លួនថា ណាហ្គា៣ ជាគម្រោង​ធំមួយសម្រាប់ទទួលភ្ញៀវទេសចរជនជាតិចិន ដែលត្រូវប៉ាន់ស្មានថា​ នឹង​មក​កាន់កម្ពុជាប្រមាណជាង ៤លាននាក់​ នៅឆ្នាំ២០២០។

របាយការណ៍អគ្គនាយក​ដ្ឋាន​ឧស្សាហ​កម្ម​ហិរញ្ញវត្ថុ​នៃ​ក្រសួង​សេដ្ឋកិច្ច និង​ហិរញ្ញវត្ថុ​ បាន​ឲ្យ​ដឹង​ថានៅបំណាច់ឆ្នាំ២០១៨ ​​កាស៊ីណូ​ដែល​មាន​អាជ្ញា​បណ្ណ​​ចំនួន ៨៨ទីតាំង នៅ​ខេត្ត​ព្រះសីហនុ​ ។

អ្នកនាំពាក្យសាលាខេត្តព្រះសីហនុ លោក ធាង ណារ៉ុង បានឱ្យដឹងថា កំណើនកាស៊ីណូនៅខេត្តព្រះសីហនុ គឺសង់ឡើងដើម្បីទទួលភ្ញៀវទេសចរ ពិសេសគឺជនជាតិចិន។ លោក ណារ៉ុង បញ្ជាក់ថាសណ្ឋាគារ កាស៊ីណូភាគច្រើនកំពុងសាង​សង់នៅឡើយ ដែលគម្រោងភាគច្រើនគ្រោងបញ្ចប់នៅឆ្នាំ២០២០ខាងមុខ។

 លោក ធាង ណារ៉ុង៖ «នៅខេត្តយើង កំពុង​អភិវឌ្ឍខ្លាំង​លើវិស័យកម្សាន្ត និងសណ្ឋាគារ (វិស័យ​កាស៊ីណូ) អគារ​ទាំងនោះនឹងចាប់ដំណើរការឆាប់ៗ​។»

ទន្ទឹមនឹងនេះ អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក ​មាស សុខសេនសាន មានប្រសាសន៍ថា ការផ្ដល់អាជ្ញាបណ្ណកាស៊ីណូមិនខុសពីការផ្តល់អាជ្ញាបណ្ណឱ្យសណ្ឋាគារ ឬកន្លែងទេសចរណ៍នោះទេ គឺស្ថាប័នពាក់ព័ន្ធសង្ឃឹមថា នឹងរួមចំណែកប្រមូលចំណូលពន្ធនានា​ដើម្បីកំណើនសេដ្ឋកិច្ចជាតិ​។

លោកបញ្ជាក់ថា៖ «តាមពិតគោលនយោបាយរបស់រាជរដ្ឋាភិបាល គឺស្វែងរកចំណូល​ពីប្រភព​ផ្សេង​ទាំងអស់ដើម្បីអភិវឌ្ឍសេដ្ឋកិច្ចជាតិ។ ការអនុញ្ញាតឱ្យបើកអាជីវកម្មទាំងអស់នៅក្នុងប្រទេសកម្ពុជា មិនថាកាស៊ីណូ ឬអង្គភាពណាមួយទេ គឺការបង្កើតការងារធ្វើជូនពលរដ្ឋហ្នឹងឯង »។

បើតាមអង្គភាពអគ្គនាយកដ្ឋានឧស្សាហកម្មហិរញ្ញវត្ថុនៃក្រសួងសេដ្ឋកិច្ច និងហិរញ្ញវត្ថុ បង្ហាញជាសារធារណៈថា អ្នកសុំអាជ្ញាបណ្ណកាស៊ីណូ ត្រូវបង់កម្រៃអាជ្ញាបណ្ណកាស៊ីណូ១ ដែលមានសុពលភាពរយៈពេលមួយឆ្នាំ គឺស្មើ ៣ម៉ឺនដុល្លារ​ និងបូកថែមសេវារដ្ឋបាល ៤៥០០ដុល្លារ។

សេចក្តីប្រកាសដដែលឲ្យដឹងថា អាជ្ញាបណ្ណកាស៊ីណូ ត្រូវបង់ ៣ម៉ឺនដុល្លារ និងសេវារដ្ឋបាល ៣ពាន់ដុល្លារ។ ផ្ទេរអាជ្ញាបណ្ណកាស៊ីណូត្រូវបង់ប្រាក់ ២ម៉ឺន ៥ពាន់ដុល្លារ និងសេវារដ្ឋបាល ៥ពាន់ដុល្លារ។ នៅពេលដែលនាំឧបករណ៍​ល្បែងចូល ត្រូវបង់ចូលរដ្ឋនូវកម្រៃសេវាកម្ម ២ពាន់ដុល្លារ។

ក្ដីរំពឹងពីសេដ្ឋកិច្ចកម្ពុជាបន្ទាប់ពីមានកំណើនកាស៊ីណូ

ច្បាប់ថវិកាជាតិឆ្នាំ២០១៩ បង្ហាញថា កម្ពុជាអាចនឹងកៀរគរចំណូលពីវិស័យកាស៊ីណូឱ្យបានជាង​៥៦លានដុល្លារ។ យោង​តាមរបាយការណ៍​ពីក្រសួង​សេដ្ឋកិច្ច និងហិរញ្ញវត្ថុ បាន​បង្ហាញថា នៅក្នុងឆ្នាំ២០១៨ កន្លង​មក កម្ពុជា​បានប្រមូល​ប្រាក់​ចំណូល​ពីវិស័យ​កាស៊ីណូ​ប្រមាណ ៤៦លានដុល្លារអាមេរិក។ ច្បាប់នេះមិនបានបង្ហាញលំអិតថា នឹងរកចំណូលពីវិស័យនេះដោយរបៀបណានោះទេ។

អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន បានមានប្រសាសន៍ថា រាជរដ្ឋាភិបាលព្យា​យាមប្រើប្រាស់មធ្យោបាយគ្រប់បែបយ៉ាង ដើម្បីបង្កើនចំណូលសេដ្ឋកិច្ចពិសេសគឺការប្រមូលពន្ធគយ ពន្ធដារ និងចំណូល​ពីប្រភពផ្សេងៗ មិនមែនតែវិស័យកាស៊ីណូមួយនោះទេ។

លោក សុខសេនសាន ពុំបានធ្វើសេចក្តីអត្ថាធិប្បាយលំអិតនោះទេ នៅពេលដែលសួរថា តើការបើកកាស៊ីណូនៅកម្ពុជានាំឱ្យមានអន្តរាយដល់ជីវភាពពលរដ្ឋឬទេ? បើពលរដ្ឋខ្មែរញៀនល្បែង?

លោក សេនសាន ប្រាប់ថា៖ «ខ្ញុំមិនថា​ម៉េចទេ​ចំពោះ​ចំណុចនេះ តែ​ក្រសួងសេដ្ឋកិច្ចនឹងពិនិត្យមើលច្បាប់ពាក់ព័ន្ធទាំងអស់»។

ស្របគ្នានេះ អ្នកនាំពាក្យសាលាខេត្តព្រះសីហនុ លោក​ ធាង​ ណារ៉ុង ពន្យល់ថា ការកើនឡើងនៃសណ្ឋាគារ និងកាស៊ីណូនៅខេត្តព្រះសីហនុ បានផ្ដល់ការងាររាប់ពាន់កន្លែងដល់ពលរដ្ឋ ពិសេសយុវជន។

 លោកបញ្ជាក់ថា៖ «សណ្ឋាគារ ឬកាស៊ីណូទាំងនោះគឺផ្ដល់ការងារច្រើន។ ពលរដ្ឋពីគ្រប់ទិសទីមករស់នៅធ្វើការនៅខេត្តព្រះសីហនុ យើងរំពឹងថា ថាខេត្តនេះនឹងកាន់តែរីកចម្រើន។

ចំពោះតំណាងសម្ព័ន្ធសហជីព លោក អាត់ ធន់ បានឯកភាពថា កាស៊ីណូពិតជាផ្ដល់ការងារធ្វើជូនពលរដ្ឋមែន។ លោកបានផ្តល់ឧទាហរណ៍ថា​ បើកាស៊ីណូមួយមានបុគ្គលិកធ្វើការចំនួន ៥០០នាក់ ហើយកម្ពុជា​មានកាស៊ីណូ២០០កន្លែង មានន័យថា កាស៊ីណូទាំងអស់នោះនឹងផ្ដល់ការងារ១០ម៉ឺននាក់។ ប៉ុន្តែ ការងារក្នុងវិស័យល្បែងនេះនឹងមិនស្ថិតស្ថេរឡើយ។

លោក អាត់ ធន់ បញ្ជាក់៖ «បុគ្គលិកចែកបៀរ​ បើគាត់​ឈប់ធ្វើការហើយមកចេញមកក្រៅ តើគាត់នឹងអាចធ្វើអីបានក្រៅពីចែកបៀរ? ចុះបើអ្នកចែកបៀរបែរជាញៀនល្បែងវិញនោះ? ខ្ញុំគិតថា ជាបញ្ហាដែលរដ្ឋត្រូវគិតគូរឱ្យបានច្បាស់។

កាលពីជាង១០ឆ្នាំមុន ក្រុមហ៊ុនភ្នាល់ល្បែងស្របច្បាប់ជាច្រើនក៏បានរកស៊ីនៅកម្ពុជាដែរ។ ក្រុមហ៊ុនដែលពលរដ្ឋស្គាល់ច្បាស់ជាងគេកាលនោះគឺ ខាំបូស៊ិក Cambo Six ។ ក្រុមហ៊ុននេះមានសាខាធំៗជាង៤០​នៅរាជធានីភ្នំពេញ និង​មានសាខានៅ​តាមបណ្ដាខេត្តសំខាន់ៗមួយចំនួន រួមមាន ព្រះសីហនុ កំពង់ចាម បន្ទាយមានជ័យ ​(ប៉ោយប៉ែត) ស្វាយរៀង (បាវិត)​ ព្រៃវែង (អ្នកលឿង) បាត់ដំបង និងសៀមរាប។ល។ ក្រុមហ៊ុននេះ មានបុគ្គលិកបម្រើការងារ​ជាង៣ពាន់នាក់។

​លុះដល់ខែកុម្ភៈ ឆ្នាំ២០០៩ លោកនាយករដ្ឋមន្ត្រីប្រកាសអាសន្នពីភាពវឹកវរក្នុងសង្គមបណ្ដាលមកពីល្បែងស៊ីសង។ លោកសម្រេចលុបចោលអាជ្ញាបណ្ណក្រុមហ៊ុនភ្នាល់បាល់ទាំងអស់ដែលកំពុងប្រតិបត្តិការនៅទូទាំងប្រទេសកម្ពុជា រួមទាំងក្រុមហ៊ុន​ ខាំបូស៊ិក ​នេះផង។

លោក ហ៊ុន ​សែន ក៏ថែមទាំងប្រកាសឱ្យក្រសួងសេដ្ឋកិច្ចចេញលុយជាតិសងក្រុមហ៊ុនវិញទៀតផង​ ព្រោះក្រុមហ៊ុនមានអាជ្ញាបណ្ណ និងមានសុពលភាព​ក្នុងដៃ។​ ទោះជាយ៉ាងណា មិនមាន​របាយការណ៍ជាក់លាក់ថា ក្រសួងសេដ្ឋកិច្ចត្រូវសងប្រាក់ទៅក្រុមហ៊ុនល្បែងទាំងនោះប៉ុន្មាននោះទេ។

បច្ចុប្បន្នភាពនៃបំរាមដែលហាមមិនឱ្យខ្មែរចូលកាស៊ីណូ

កាលពីចុងខែមិថុនា ឆ្នាំ២០១៩ អ្នកសារព័ត៌មានបានចូលទៅក្នុងកាស៊ីណូមួយមានទីតាំងនៅជាប់នឹងរង្វង់មូលតោ២ នៅខេត្តព្រះសីហនុ។ ក្រុមសន្តិសុខបានបានឆែកខ្លួន បន្ទាប់មកស្គែនស្វែងរកអាវុធ​ជាតិផ្ទុះ។ ពេលឆែកឆេរ ​សន្តិសុខទាំងនោះ និយាយថា៖ «អញ្ជើញចូលបង សូមឱ្យបងឈ្នះច្រើនៗ»។

នៅក្នុងកាស៊ីណូជាន់ក្រោម តុល្បែងជាង១០ ពាក់កណ្ដាលមាន​មនុស្ស​អង្គុយលេង។​ យ៉ាងតិចណាស់មានជនជាតិខ្មែរ ២០នាក់កំពុងរីករាយអ៊ុតបៀររបស់ពួកគាត់ ខណៈដែលតុល្បែងធំមួយមានអ្នកលេងល្បែងចម្រុះជាតិសាសន៍កំពុងអង្គុយ​លេងទល់មុខគ្នា។ នៅផ្នែកខាងលើជាបន្ទប់ល្បែងវីអាយភី ដែលភ្ញៀវធម្មតាមិនអាចចូលមើលទេ។ ចំណែកឯបន្ទប់ផ្នែកផ្សេងជាតុល្បែង ដែលចែកបៀរផ្សាយផ្ទាល់ចេញទៅក្រៅ។

បុរសម្នាក់ជាអ្នកមកពីខេត្តកំពតប្រាប់ថា ខ្លួនចាញ់ប្រាក់អស់៣០០ដុល្លារ និងបន្តលេងទៀតដើម្បីស្រង់ដើមវិញ។ គាត់ថា តុធំដែលមានភ្ញៀវចម្រុះជាតិសាសន៍លេងនោះ គេលេងធំណាស់ គាត់បានត្រឹមឈរមើលគេប៉ុណ្ណោះ។​

ស្ត្រីម្នាក់ទៀតដែលចូលមកលេងល្បែងបាននិយាយថា គាត់អាចចូលកាស៊ីណូណាមួយក៏បានដែរឱ្យតែមានលុយចូលលេង។

មេការតុល្បែងជាអ្នកតាមមើលភ្ញៀវណាដែលមិនដូរលុយលេងល្បែង។ បុរសមានវ័យជាង៣០ឆ្នាំ ជិត១០នាក់ ជាអ្នកឃ្លាំមើលតុល្បែងទាំងនោះ។ ពួកគេនឹងសួរមនុស្សទាំងអស់ដែលចូលកាស៊ីណូ នៅពេលពួកគេមិន​ឃើញដូរលុយលេង។

នារសៀលម៉ោង៤ នៅដើមខែកក្កដា នៅជាន់ផ្ទាល់ដីនៃកាស៊ីណូណាហ្គា១ រាជធានីភ្នំពេញ មានតុល្បែងជាច្រើនដាក់តម្រៀបគ្នា។ ខ្លះមានអ្នកលេង និងខ្លះទៀតនៅទំនេរ។ តុល្បែងមួយមានអ្នកចាក់បៀរ ៨នាក់​ដែលសុទ្ធតែស្រីៗ ហើយនិយាយភាសាខ្មែរឆ្លងឆ្លើយគ្នា។ អ្នកទាំងនោះកំពុងសើចសប្បាយព្រោះចាក់បៀរឈ្នះ។ លុះសប្បាយបានបន្តិចក៏កើតរឿងទាស់សម្តីគ្នា ដោយសារបាត់លុយ។​ មេការតុល្បែងបានសម្របសម្រួល និងឆែកកាមេរ៉ា រកលុយដែលបាត់។

នៅកៀនជណ្ដើរឡើងវិញ មានម៉ាស៊ីនស្លុតរ៉ូឡែតធំៗ ដែលមានភ្ញៀវបុរសវ័យជាង៥០ឆ្នាំ មានទាំងជនជាតិចិន និងខ្មែរកំពុងដាក់លុយក្នុងម៉ាស៊ីន និងដកលុយចេញពីក្នុងម៉ាស៊ីន។ អ្នកខ្លះសើច អ្នកខ្លះក៏មុខស្ងួតទៅតាមលទ្ធផលដែលម៉ាស៊ីនចេញ។

យុវជនម្នាក់ ជាបុគ្គលិកប្រចាំការនៅម៉ាស៊ីនស្លុតបានប្រាប់ថា គាត់បានធីបច្រើនបើភ្ញៀវឈ្នះ តែបើភ្ញៀវចាញ់គាត់ត្រូវភ្ញៀវស្តីឱ្យ និងរករឿង។

យុវជនរូបនេះបញ្ជាក់ថា៖ «ភ្ញៀវចិន និងវៀតណាម​កាចៗជាងភ្ញៀវខ្មែរ ថៃ ឬជនជាតិ​ផ្សេងទៀត។ ខ្មែរច្រើនណាស់ចូលលេង តែក៏មានខ្មែរៗមកចូលមើល និងកម្សាន្តស្ដាប់ភ្លៀង ច្រៀងខារ៉ាអូខេ ក្រៅពីលេងល្បែងដែរ។

កំណើនកាស៊ីណូ នាំក្ដីកង្វល់នានា

គេហទំព័រកាស៊ីណូពិភពលោក​ worldcasinodirectory.com បង្ហាញថា កាស៊ីណូស្របច្បាប់ដែលកំពុងដំណើរការនៅកម្ពុជា មានចំនួន៥២ មានទីតាំងនៅតាមបណ្ដោយព្រំដែននានា ខេត្តព្រះសីហនុ និងរាជធានីភ្នំពេញ។ គេហទំព័រនេះ​បញ្ជាក់បន្ថែមថា ​ខេត្តព្រះសីហនុ អាចនឹងក្លាយជាម៉ាកាវថ្មីផង បើសិនជាគម្រោងការកាស៊ីណូសង់រួចរាល់។

នាយកប្រតិបត្តិអង្គការតម្លាភាពអន្តរជាតិកម្ពុជា លោក ព្រាប កុល មានប្រសាសន៍ថា កម្ពុជាអាច​នឹងក្លាយ​ជាប្រទេសដែល​ក្រុមជនទុច្ចរិតរើសយកមកលាងលុយកង្វក់ តាមរយៈ​ការមកលេងល្បែងនៅកាស៊ីណូទាំងអស់នេះ។ លោកបន្តថា កំណើនកាស៊ីណូនេះ គួរឱ្យបារម្ភ និងពិតជារឿងគួរឱ្យយកចិត្តទុកដាក់។

 លោក ព្រាប កុល៖ «អាមេរិក ម៉ាកាវ គេមានកាស៊ីណូច្រើនមែន តែច្បាប់គេតឹងរ៉ឹង គេគ្រប់គ្រងបានល្អ។ ចំណែកកម្ពុជា គឺយើងជាប្រទេសមានសន្ទស្សន៍នៃអំពើពុករលួយខ្ពស់។ ហេតុនេះ យើងប្រឈមខ្លាំងនឹងការលាងលុយ ឬជំនួញគ្រឿងញៀន ជាដើម។»

រដ្ឋមន្ត្រីក្រសួងមហាផ្ទៃ លោក​ ស ខេង ចេញបញ្ជាឱ្យស្នងការដ្ឋាននគរបាលទាំងអស់ គ្រប់គ្រងកាស៊ីណូនានា ដើម្បីបង្ការការរីករាលដាលនៃគ្រឿងញៀន។​ លោកបង្ហាញក្ដីកង្វល់ថា ​បើមិន​ពិនិត្យឱ្យបានហ្មត់ចត់ទេ ឈ្មួញនឹងយកកាស៊ីណូមកជាកន្លែងចែកចាយគ្រឿងញៀនមិនខាន។ ការបញ្ជាក់នេះ ធ្វើឡើកាលពីចុងខែមិថុនា ក្នុងពេលដែលលោកថ្លែងសុន្ទរកថា នាពិធីឡើងកាន់តំណែងថ្មីរបស់លោក គួច ​ចំរើន ជាអភិបាលខេត្តព្រះសីហនុ។

អ្នកជំនាញសេដ្ឋកិច្ចនៃរាជបណ្ឌិតសភាកម្ពុជា លោក គី សេរីវឌ្ឍន៍ មានប្រសាសន៍ថា ពលរដ្ឋកម្ពុជានឹងទទួលផលចំណេញពីការបើកកាស៊ីណូ បើសិនជាកម្ពុជាអនុវត្តច្បាប់បានល្អ និងមានយុទ្ធសាស្ត្រសេដ្ឋកិច្ចច្បាស់លាស់។ ប៉ុន្តែ បើគ្រប់គ្រងមិនបានល្អវិញ កាស៊ីណូច្រើននឹងក្លាយជាបញ្ហាថ្មីមួយទៀតដែលជាឧបសគ្គដល់ការអភិវឌ្ឍ ។

លោក គី សេរីវឌ្ឍន៍៖ «ចិនចូលចិត្តលេងល្បែង ខ្មែរអាចចំណេញពីគាត់ បើនាំគ្នាច្រើនមកលេងស្រុកខ្មែរ។​ យើងបានពន្ធ បានការងារធ្វើ តែបើយើងនាំគ្នាញៀនលេងល្បែង​វិញច្បាស់​ជាវិនាស»។

កម្ពុជាមានច្បាប់មួយដែលត្រូវបានដាក់ឱ្យប្រើប្រាស់កាលពីទសវត្សទី៩០ ច្បាប់នេះមានវិសាលភាពគ្រប់គ្រងល្បែងស៊ីសងទាំងឡាយ។​ បើតាមច្បាប់នេះ អ្នកលេងល្បែង និងបើក​កន្លែងលេងល្បែងដោយគ្មានការអនុញ្ញាតពីរាជរដ្ឋាភិបាលកម្ពុជា អាចនឹងត្រូវជាប់ពន្ធនាគាររហូតដល់៥ឆ្នាំនិងពិន័យជាប្រាក់មួយចំនួនទៀត។ ប្រទេសកម្ពុជាមិនទាន់មានច្បាប់​គ្រប់គ្រងកាស៊ីណូនៅឡើយទេ បើទោះបីជារដ្ឋផ្ដល់អាជ្ញាបណ្ណឱ្យកាស៊ីណូរាប់រយកាស៊ីណូទៅហើយក្ដី។

អតីតអនុប្រធានគណៈកម្មាធិការសេដ្ឋកិច្ចហិរញ្ញវត្ថុ សវនកម្មនៃរដ្ឋសភា លោក សុន ឆ័យ ក្នុងឆ្នាំ២០១៤ ធ្លាប់បានស្នើទៅកាន់រដ្ឋសភាកម្ពុជាឱ្យបង្កើតច្បាប់គ្រប់គ្រងកាស៊ីណូ ដើម្បីបង្កើនចំណូល​ជាតិ។ លោកថា កម្ពុជាបាត់បង់ចំណូល​ពន្ធពីកាស៊ីណូ ប៉ុន្តែ សំណើច្បាប់របស់តំណាងរាស្ត្រគណបក្សជំទាស់រូបនេះ ត្រូវច្រានចោលដោយភាគីបក្សកាន់អំណាច។ បើតាមមន្ត្រី​ក្រសួង​សេដ្ឋកិច្ច និងហិរញ្ញវត្ថុ ច្បាប់គ្រប់គ្រងកាស៊ីណូនេះកំពុងស្ថិតនៅជាសេចក្ដីព្រាងនៅឡើយ។

កាស៊ីណូណាហ្គា ដែលជាកាស៊ីណូធំជាងគេនៅកម្ពុជា ប្រកាសថា​ ឧស្សាហកម្មកាស៊ីណូនៅកម្ពុជាមានកំណើនខ្លាំង និងប្រកបដោយទំនុកចិត្ត។ របាយការណ៍របស់ណាហ្គាខប ដែលផ្សាយជាសាធារណៈលើទីផ្សារភាគហ៊ុន Bloomberg បង្ហាញថា ក្រុមហ៊ុននេះរកបានចំណូលជាង ១ពាន់ ៤រយលានដុល្លារ និងចំណេញលុយសុទ្ធជាង ៣៣០លានដុល្លារ កាលពីឆ្នាំ២០១៨។

ទោះជាយ៉ាងណា កាស៊ីណូផ្សេងៗទៀតដែលមិនបានចូលក្នុងទីផ្សារហ៊ុនអន្តរជាតិ មិនបានបង្ហាញពីរបាយការណ៍ចំណូលរបស់ខ្លួនជាសាធាណៈឡើយ។

ឧស្សាហកម្មកាស៊ីណូនៅកម្ពុជាគ្រប់គ្រងដោយក្រុមហ៊ុនធំៗដែលមានអ្នកជំនួញបរទេស និងអ្នកជំនួញស្រុកខ្មែរផង។ កាស៊ីណូខ្លះគ្រប់គ្រងដោយក្រុមហ៊ុនចិន ម៉ាឡេស៊ី វៀតណាម និងកាស៊ីណូខ្លះទៀតកើតឡើងដោយសារចូលហ៊ុនគ្នារវាងសេដ្ឋីស្រុកខ្មែរ និងអ្នករកស៊ីបរទេស ឬជាកម្មសិទ្ធិរបស់អ្នកជំនួញខ្មែរតែម្តង។

អ្នកជំនួញខ្មែរដែលរកស៊ីកាស៊ីណូ រួមមាន លោក លី យ៉ុងផាត់ មានកាស៊ីណូនៅកោះកុង ព្រះសីហនុ​ និងឧត្តរមានជ័យ។ លោក គិត ម៉េង មានកាស៊ីណូនៅស្វាយរៀង និងក្រុមហ៊ុនអនឡាញ។ លោក កុក អាន មានកាស៊ីណូ​នៅព្រះសីហនុ ស្វាយរៀង និងតាមព្រំដែនមួយចំនួនទៀត។ លោក ទ្រី ភាព មានកាស៊ីណូនៅរតនគិរី​ និងឧត្តរមានជ័យ។ លោក​ សុខ គង់ មានកាស៊ីណូសុខានៅភ្នំបូកគោ និងខេត្តព្រះសីហនុ។ល។

​ពលរដ្ឋរស់នៅរាជធានីភ្នំពេញដែលធ្លាប់មានប្ដីជាអ្នកញៀនល្បែងកាស៊ីណូ អ្នកស្រី ពិសី លើកឡើងថា គ្រួសារអ្នកស្រីរកសុភមង្គលមិនបាននោះទេ ដោយប្តីតែងតែរករឿងនៅពេលចាញ់ល្បែងម្តងៗ។ ក្រោយមក អ្នកស្រី បានលែងលះជាមួយស្វាមីអ្នកស្រី។

អ្នកស្រីបញ្ជាក់ថា ៖ «ខ្ញុំគ្រាន់តែលឺថា កាស៊ីណូកើនឡើង ខ្លាចតែម្តង។ ​កាលមុន ប្ដីខ្ញុំយកឡានលក់ បង្ខំលក់ផ្ទះ វាយខ្ញុំ យកលុយ​លេង​ល្បែង​អស់។ ចាញ់អស់ រត់ចោលផ្ទះ​បាត់ ខ្ញុំត្រូវចិញ្ចឹមកូនតែម្នាក់ឯង។ ខ្ញុំពិតជាស្អប់ពាក្យកាស៊ីណូហ្នឹងណាស់»៕