លោកនាយករដ្ឋមន្ត្រី ហ៊ុន សែន អះអាងថា ពេលនេះ សុខភាពលោកល្អប្រសើរ រឹងមាំ មានកម្លាំងពេញលេញ ក្រោយពេលលោកមានជំងឺគ្រេចស្មាមួយរយៈ។
លោក ហ៊ុន សែន សរសេរសារនៅលើហ្វេសប៊ុករបស់លោកថា ពេលនេះលោកមានសុខភាពល្អ មានកម្លាំងពេញលេញក្នុងការបម្រើការងារជូនជាតិ។
នៅក្នុងសារនោះ លោក ហ៊ុន សែន ក៏បានបញ្ជាក់ថា នៅថ្ងៃទី២ ខែសីហាខាងមុខនេះ លោកនឹងដឹកនាំការប្រជុំគណៈរដ្ឋមន្ត្រីដូចធម្មតា។
លោក ហ៊ុន សែន៖ «នៅថ្ងៃសុក្រ ទី២ ខែសីហានេះ ខ្ញុំនឹងដឹកនាំប្រជុំគណៈរដ្ឋមន្រ្តីពេញអង្គដូចធម្មតា។ ខ្ញុំសូមអរគុណសារជាថ្មីដល់បងប្អូនជនរួមជាតិ ដែលបានជូនពរខ្ញុំ និងនៅជាមួយខ្ញុំបន្តថែក្សាការពារសន្តិភាព ដើម្បីប្រទេសជាតិយើងមានឱកាសអភិវឌ្ឍកាន់តែរីកចម្រើនទៅមុខទៀត។»
កាលពីថ្ងៃសុក្រ ទី២៦ សប្តាហ៍មុន គណៈរដ្ឋមន្ត្រីលើកពេលប្រជុំដោយមិនបានបញ្ជាក់មូលហេតុនោះទេ។ ក្រោយមក អ្នកនាំពាក្យរដ្ឋាភិបាល លោក ផៃ ស៊ីផាន ថ្លែងថា ការលើកពេលនេះ ដោយសាររដ្ឋមន្ត្រីមួយចំនួនមានការងារនៅតាមខេត្ត និងមិនមានរបៀបវារៈគ្រប់គ្រាន់សម្រាប់ប្រជុំ។ លោក ផៃ ស៊ីផាន លើកឡើងថា ការលើកពេលប្រជុំនេះមិនពាក់ព័ន្ធបញ្ហាសុខភាពនាយករដ្ឋមន្ត្រីនោះទេ។