មន្ត្រីជាន់ខ្ពស់ក្រសួងយុត្តិធម៌ លើកឡើងថា សាលាឧទ្ធរណ៍ ៣ទៀត នឹងត្រូវបើកឲ្យដំណើរការនៅតាមបណ្តាខេត្តមួយចំនួននៅឆ្នាំក្រោយនេះ ក្រៅពីសាលាឧទ្ធរណ៍នៅភ្នំពេញ ដើម្បីពន្លឿនសំណុំរឿងដែលកំពុងកកស្ទះ។
ក្នុងសន្និសីទព័ត៌មានស្តីពីការអនុវត្តផែនការណ៍កំណែទម្រង់ប្រព័ន្ធយុត្តិធម៌រយៈពេល ១ឆ្នាំក្រោយការបោះឆ្នោតអាណត្តិទី៦នេះ ធ្វើនៅរាជធានីភ្នំពេញ ថ្ងៃនេះ អ្នកនាំពាក្យក្រសួងយុត្តិធម៌ លោក ជិន ម៉ាលីន អះអាងថា សាលាឧទ្ធរណ៍ដែលគ្រោងបើកឲ្យដំណើរការនៅឆ្នាំក្រោយនោះ មាននៅខេត្តត្បូងឃ្មុំ ខេត្តបាត់ដំបង និងខេត្តព្រះសីហនុ ។លោកថា អគារសម្រាប់ស្ថាប័នតុលាការទាំង ៣នេះ ត្រូវបានសាងសង់បាន ៨០ភាគរយហើយ។
អ្នកនាំពាក្យរូបនេះ អះអាងថា ការកកស្ទះសំណុំរឿងនៅសាលាឧទ្ធរណ៍នាពេលបច្ចុប្បន្ននេះ ដោយសារតែសាសាលាឧទ្ធរណ៍ មានតែមួយនៅរាជធានីភ្នំពេញ ហើយលោកថា សាលាឧទ្ធរណ៍មួយនេះ ទទួលដោះស្រាយបណ្តឹងតវ៉ាមកពី ២៤រាជធានីខេត្ត។
បើតាមមន្ត្រីក្រសួងយុត្តិធម៌ដដែល សំណុំរឿងដែលកកស្ទះជាង ៥០ភាគរយជាសំណុំរឿងគ្រឿងញៀន ព្រោះសមត្ថកិច្ចនៅបន្តបើកយុទ្ធនាការប្រយុទ្ធប្រឆាំងការជួញដូរគ្រឿងញៀន។
ក្រសួងមហាផ្ទៃធ្លាប់ស្នើក្រសួងយុត្តិធម៌ឲ្យពិនិត្យមើលពីដំណើរការក្តីរបស់តុលាការ ដើម្បីកាត់បន្ថយភាពចង្អៀតក្នុងពន្ធនាគារ៕
