រដ្ឋបាលទីក្រុងហុងកុង ព្រមានដល់ក្រុមបាតុករ នៅព្រឹកថ្ងៃទី ០៥ ខែសីហា នេះ ដោយថា ពួកគេអាចនឹងច្រានស្ថានការណ៍នៅទីក្រុងឱ្យផុងចូលទៅក្នុងភាពវឹកវរខ្លាំង បន្ទាប់ពីចលនាចុះផ្លូវធ្វើបាតុកម្មទាមទារឱ្យលោកស្រី Carrie Lam លាលែងពីតំណែង ឈានដល់សប្តាហ៍ថ្មី។
សារព្រមាននេះ ធ្វើឡើងបន្ទាប់ពីសកម្មភាពបាតុកម្មពលរដ្ឋហុងកុង ឈានចូលដល់សប្តាហ៍ទី ៩ និងរីករាលដាលពាសពេញទីក្រុង ជាពិសេសនៅតាមសង្កាត់ពាណិជ្ជកម្មសំខាន់ៗ ហើយឈានដល់ការប្រើប្រាស់អំពើហិង្សាទៅលើក្រុមប៉ូលីស និងជើងហោះហើរជាង១០០ ត្រូវបានបង្ខំចិត្តលុបចោល។
ក្រុមបាតុករមួយចំនួនបានដើរចេញពីតម្រាយផ្លូវកំណត់ដោយអាជ្ញាធរ ចូលទៅកាន់កាប់ និងបិទចរាចរនៅតាមវិថីសំខាន់ៗក្នុងសង្កាត់ពាណិជ្ជកម្ម Causeway Bay នៃកោះ Hong Kong ហើយប៉ងបិទផ្លូវដែលតភ្ជាប់ពីកោះនេះទៅកាន់តំបន់ Kowloon។
ជាមួយគ្នានោះ ក្រុមបាតុករបានប្រមូលផ្តុំគ្នាចុះផ្លូវធ្វើបាតុកម្មនៅតំបន់ ៧ ផ្សេងៗគ្នារបស់ទីក្រុង ព្រមទាំងបានបំផ្លាញទ្វារកញ្ចក់នៃស្ថានីយ៍ប៉ូលីសមួយកន្លែង ព្រមទាំងបានដុតកម្ទេចយានយន្តជាច្រើនទៀត។
បាតុកម្មរបស់ពលរដ្ឋហុងកុងនេះ បានចាប់ផ្តើមតាំងពីដើមខែមិថុនា ដោយដំបូងឡើយ ធ្វើឡើងដើម្បីទាមទារឱ្យរដ្ឋបាលទីក្រុងហិរិញ្ញវត្ថុដ៏បំផុតមួយរបស់ពិភពលោកនេះ លុបចោលនូវសំណើរច្បាប់ធ្វើបត្យាប័នជនជាប់សង្ស័យហុងកុងទៅកាន់ប្រទេសចិនដីគោក។
ជាលទ្ធផល នៅថ្ងៃទី០៩ កក្កដា ប្រមុខដឹកនាំទីក្រុងហុងកុង លោកស្រី Carrie Lam បានប្រកាសលុបចោលសេចក្តីព្រាងច្បាប់ដ៏ចម្រូងចម្រាស់មួយនេះ ដែលត្រូវពលរដ្ឋហុងកុងចាត់ទុកជាការបង្កើនឥទ្ធិពលដល់រដ្ឋអំណាចបក្សកម្មុនីយចិនកាន់តែខ្លាំង។
ទោះយ៉ាងណា ចលនាបាតុកម្មបានរីកធំឡើងៗ រហូតដល់ក្លាយជាមហាបាតុកម្ម ៥ ថ្ងៃជាប់ៗគ្នាគិតត្រឹមថ្ងៃចន្ទនេះ ដើម្បីទាមទារឱ្យលោកស្រី Carrie Lam ចុះចេញពីតំណែង និងស្នើរឱ្យមានការស៊ើបអង្កេតលើការប្រើប្រាស់អំពើហិង្សាទៅលើក្រុមបាតុករពីសំណាក់ប៉ូលីស។
ឆ្លើយតបទៅនឹងចលនាទាមទាររបស់មហាជននេះ រដ្ឋបាលទីក្រុងហុងកុង បានហៅក្រុមបាតុករថា កំពុងរំលោភបំពានច្បាប់ បង្កចលាចលតាមទីសធារណៈ និងបង្កអំពើហិង្សាទៅលើមន្រ្តីអនុវត្តច្បាប់ ដែលសកម្មភាពទាំងនេះ នឹងប៉ះពាល់ធ្ងន់ធ្ងរដល់សង្គម សេដ្ឋកិច្ច និងការប្រកបរបរចិញ្ចឹមជីវិតរបស់ពលរដ្ឋទីក្រុង។
រដ្ឋបាលទីក្រុងហុងកុងចាត់ទុកសកម្មភាពទាំងនោះថា បានដើរហួសឆ្ងាយពីព្រំដែននៃការធ្វើបាតុកម្មដោយសន្តិភាព និងមានសន្តាប់ធ្នាប់ ដែលរដ្ឋបាល និងសាធារណជនទូទៅនឹងមិនអាចអន់អោនឱ្យបាន ទោះក្រោមស្ថានការបែបណាក៏ដោយ ហើយថា «វានឹងរុញច្រានហុងកុងធ្លាក់ក្នុងស្ថានភាពគ្រោះថ្នាក់ដ៏ធ្ងន់ធ្ងរមួយ»។
ចាប់តាំងពីមានចលនាបាតុកម្មពីសំណាក់ពលរដ្ឋហុងកុងមក សេដ្ឋកិច្ចរបស់ទីក្រុងមានផលប៉ះពាល់ខ្លាំងជាងគេ ដោយក្រុមថ្នាក់ដឹកនាំជំនួញផ្សេងៗនិយាយថា ការលក់របស់ពួកគេមានការធ្លាក់ចុះទាបធៀបនឹងឆ្នាំមុន ដោយក្នុងចំនោមនោះ ក៏មានរាប់បញ្ចូលក្រុមហ៊ុនអកាសចរណ៍ផងដែរ។
គួរបញ្ជាក់ថា ក្នុងរយៈពេលជាងពីរខែនៃចលនាបាតុកម្ម អំពើហិង្សាបានកើតឡើងជាច្រើនលើករវាងក្រុមបាតុករ និងប៉ូលីស ដោយមានការប្រើប្រាស់ឧស្ម័នបង្ហូរទឹកភ្នែក ចោលដុំថ្ម និងដបសាំង ជាដើម។ រហូតមកទល់ពេលនេះ មានបាតុករចំនួន ៦៦នាក់ហើយត្រូវបានចាប់ខ្លួន ក្នុងនោះ ៤៤ នាក់ ត្រូវជាប់ចោទពីបទកូបកម្ម ដែលអាចមានស្ថានទម្ងន់ទោសជាប់ក្នុងពន្ធធានាគាររហូតដល់ ១០ ឆ្នាំ៕
