ប្រធានាធិបតីនៃប្រទេសស្រីលង្កា លោក ម៉ៃទ្រីប៉ាឡា ស្រ៊ីសេនា (Maithripala Sirisena) នឹងអញ្ជើញមកបំពេញទស្សនកិច្ចផ្លូវរដ្ឋរយៈពេល ៣ថ្ងៃចាប់ពីថ្ងៃទី០៧ ដល់ថ្ងៃទី១០ ខែសីហា ឆ្នាំ២០១៩។
សេចក្ដីប្រកាសព័ត៌មានក្រសួងការបរទេសកម្ពុជា បានឲ្យដឹងថា ក្នុងដំណើរទស្សនកិច្ចនេះ ប្រធានាធិបតីស្រីលង្កានឹងចូលគាល់ព្រះករុណាព្រះមហាក្សត្រ នៅក្នុងព្រះបរមរាជវាំង។
មេដឹកនាំស្រីលង្ការូបនេះ ក៏នឹងអញ្ជើញជួបប្រជុំទ្វេភាគីជាមួយលោកនាយករដ្ឋមន្ត្រី ហ៊ុន សែន ផងដែរ ដើម្បីជជែកអំពីចំណងទាក់ទងទ្វេភាគី ជាពិសេសទំនាក់ទំនងវិស័យព្រះពុទ្ធសាសនា។ ថ្នាក់ដឹកនាំទាំងពីរ ក៏នឹងធ្វើការផ្លាស់ប្តូរទស្សនៈគ្នាលើបញ្ហាតំបន់ និងអន្តរជាតិ ដែលជាការព្រួយបារម្ភនិងផលប្រយោជន៍រួមផងដែរ។
បន្ទាប់ពីបញ្ចប់កិច្ចប្រជុំ លោកប្រធានាធិបតី និងនាយករដ្ឋមន្ត្រីកម្ពុជា នឹងធ្វើសាក្សីក្នុងពិធីចុះហត្ថលេខាលើឯកសារកិច្ចសហប្រតិបត្តិការមួយចំនួនផ្នែកសេដ្ឋកិច្ច សង្គម និងសាសនា៕
