ក្រសួងរៀបចំដែនដី ណែនាំឱ្យប្រជាពលរដ្ឋដែលរស់នៅជិតអគារកម្ពស់៩ជាន់១កន្លែងនៅក្រុងព្រះសីហនុ រើចេញជាបន្ទាន់ ដោយបារម្ភខ្លាចគ្រោះថ្នាក់ព្រោះអគារនោះកសាងឡើងដោយខុសច្បាប់ហើយបានស្រុតផ្នែកខ្លះ។
សេចក្តីប្រកាសព័ត៌មានរបស់ក្រសួងកាលពីម្សិលមិញ ឱ្យដឹងថា សំណង់អគារ ពហុមុខងារកម្ពស់៩ជាន់ ធ្វើឡើងខុសច្បាប់ ហើយស្រុតពីរថ្ងៃជាប់គ្នាបន្តបន្ទាប់គឺថ្ងៃទី៨ខែសីហា ស្រុត ពី៤០ទៅ៨០ មីលីម៉ែត្រ ១ថ្ងៃបន្ទាប់ស្រុតទៅតាមផ្នែកពី៩ទៅ២៨មីលីម៉ែត្រ។
សេចក្តីប្រកាស៖«ប្រជាពលរដ្ឋដែលរស់នៅជុំវិញអគារនេះ ត្រូវមានការប្រុងប្រយ័ត្នខ្ពស់ និងត្រូវចាកចេញពីលំនៅដ្ឋានជាបន្ទាន់ រហូតដល់មានការចាត់ចែងរួចរាល់។»
ក្រសួងរៀបចំដែនដីបានសម្រេចឱ្យម្ចាស់ការដ្ឋានផ្អាកសាងសង់ និង ចាប់ផ្តើមរុះរើចេញវិញ ដោយសារតែសំណង់មិនមានសុវត្ថិភាពគ្រប់គ្រាន់។
សំណង់អគារពហុមុខងារនេះ សាងសង់ដោយក្រុមហ៊ុន ឈួនរិន ខនស្រ្តាក់សិន អេនជីនារីង ស្ថិតនៅទល់មុខរង្វង់មូលតោ២ វិថី២ធ្នូ ភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ។
កាលពីថ្ងៃទី២២ខែមិថុនា សំណង់អគារកម្ពស់៧ជាន់ នៅខេត្តព្រះសីហនុបានបាក់ បណ្តាលឱ្យមានអ្នកស្លាប់ចំនួន២៨នាក់ និងរបួសចំនួន២៦នាក់។
