រដ្ឋមន្ត្រីក្រសួងការបរទេសរបស់កម្ពុជា និងវៀតណាម នឹងដឹកនាំការប្រជុំគណៈកម្មការចម្រុះកម្ពុជា-វៀតណាម ស្តីពីកិច្ចសហប្រតិបត្តិការដែលធ្វើឡើងនៅរាជធានីភ្នំពេញពីថ្ងៃទី២០ដល់២១ខែសីហា។
តាមសេចក្តីប្រកាសព័ត៌មានរបស់ក្រសួងការបរទេសគឺកិច្ចប្រជុំនេះ ដឹកនាំដោយលោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា និង លោក ផាម ប៊ិញមិញ រដ្ឋមន្ត្រីការបរទេសរបស់វៀតណាម។ កិច្ចប្រជុំនេះ ស្តីពីកិច្ចសហប្រតិបត្តិការ សេដ្ឋកិច្ច វប្បធម៌ វិទ្យាសាស្ត្រ និង បច្ចេកទេស។
កិច្ចប្រជុំរបស់គណៈកម្មការចម្រុះកម្ពុជា-វៀតណាម ដែលនឹងធ្វើឡើងនៅសប្តាហ៍ក្រោយនេះ គឺជាការប្រជុំគ្នាលើកទី៧។ កម្ពុជាបញ្ជាក់ថា ការរៀបចំប្រជុំប្រចាំឆ្នាំបានទៀងទាត់នេះ ក្នុងគោលបំណងធ្វើបច្ចុប្បន្នភាពវឌ្ឍនភាព កិច្ចសហប្រតិបត្តិការ រួមទាំងការរិះរកវិធី និងមធ្យោបាយនានា ដើម្បីពង្រីកថែមទៀតនូវិសាលភាព និងប្រសិទ្ធិភាពទំនាក់ទំនងនៃប្រទេសទាំងពីរ។
