ចិនពន្យល់រៀបរាប់ប្រាប់កម្ពុជាពីសកម្មភាពរបស់អាមេរិកទាំងការអត្ថាធិប្បាយ ផ្សព្វផ្សាយព័ត៌មានបំផ្លើស និងឥរិយាបថផ្សេងៗ ក្នុងរូបភាពចាក់រុកបង្កឱ្យមានភាពចលាចលនៅហុងកុងក៏ដូចនៅក្នុងប្រទេសផ្សេងទៀតជាលេសការពារលទ្ធិប្រជាធិបតេយ្យ និងសេរីភាព។
នៅក្នុងលិខិតកម្រាស់៤ទំព័រជាភាសាខ្មែររបស់ស្ថានទូតចិនប្រចាំកម្ពុជា បានថ្លែងអំណរគុណដល់រដ្ឋាភិបាលកម្ពុជាដែលតែងតែគាំទ្រចិន។ ក្នុងលិខិតនេះក៏បានលើកឡើងថា បញ្ហាហុងកុងបច្ចុប្បន្នកើតឡើងដោយសារតែការជ្រៀតជ្រែកពីមជ្ឈិមប្រទេសរួមមានសហរដ្ឋអាមេរិកផងដែរក្នុងនោះ។
ការជ្រៀតជ្រែកដែលសំដៅនៅពេលនេះគឺចិនលើកឡើងថា អាមេរិកអត្ថាធិប្បាយលើកសរសើរបាតុករ និងរិះគន់សកម្មភាពកងកម្លាំងរក្សាសណ្តាប់ធ្នាប់ ហើយលើសពីនេះស្ថាប័នអាមេរិកនៅហុងកុងទទួលជួបក្រុមរៀបចំបាតុកម្មប្រឆាំងទៀតផង។
លិខិតស្ថានទូតចិន៖«តួអង្គមិនល្អ ដែលសហរដ្ឋអាមេរិកកំពុងដើរតួក្នុងស្ថានភាពចលាចលនៅទីក្រុងហុងកុងធ្វើឱ្យខ្ញុំនឹកដល់សកម្មភាពបដិវដ្តន៍ពណ៌ ដែលធ្លាប់កើតមាននៅអឺរ៉ុបខាងកើត អាស៊ីកណ្តាល ព្រមទាំងប្រទេសមួយចំនួនក្នុងទ្វីបអាហ្វ្រិក។»
ក្នុងលិខិតរបស់ស្ថានទូតចិនប្រចាំនៅកម្ពុជានេះ ក៏បានលើកឡើងថា អាមេរិកបានបំផ្លើសព័ត៌មានថា ចិនរៀបចំមូលដ្ឋានទ័ពប្រចាំនៅកម្ពុជា។