លោកនាយករដ្ឋមន្ត្រីហ៊ុន សែន គ្រោងចូលរួមកម្មវិធីមួយនៅប្រទេសវៀតណាមខែក្រោយ ហើយនឹងជំរុញឱ្យអ្នកវិនិយោគប្រទេសនោះបង្កើនការវិនិយោគនៅកម្ពុជា។
ក្នុងពិធីជំនួបជាមួយរដ្ឋមន្ត្រីការបរទេសវៀតណាមលោក ផាម ប៊ិញមិញ(Binh Minh) នៅភ្នំពេញកាលពីម្សិលមិញ លោកនាយករដ្ឋមន្ត្រីហ៊ុន សែន បានស្នើឱ្យភាគីវៀតណាមរៀបចំវេទិកាធុរកិច្ច ដើម្បីលោកមានឱកាសកៀងគរអ្នកវិនិយោគរបស់វៀតណាម។
ហ្វេសប៊ុកលោក ហ៊ុន សែន៖«សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក៏បានស្នើឱ្យថ្នាក់ដឹកនាំវៀតណាមរៀបចំវេទិកាធុរកិច្ចកម្ពុជា-វៀតណាម នៅពេលដែលដំណើរទស្សនកិច្ចរបស់សម្ដេចទៅកាន់ប្រទេសវៀតណាមអំឡុងខែកញ្ញាខាងមុខនេះ ដើម្បីជាឱកាសនៃការកៀងគរអ្នកវិនិយោគវៀតណាមមកវិនិយោគនៅក្នុងប្រទេសកម្ពុជា។ សម្ដេចតេជោនាយករដ្ឋមន្ត្រី ក៏បានមានប្រសាសន៍អំពីការជំរុញទំហំពាណិជ្ជកម្មនៃប្រទេសទាំងពីរឲ្យមានការកើនឡើងថែមទៀតផងដែរ។
របាយការណ៍រដ្ឋាភិបាលកម្ពុជាបង្ហាញថា គិតត្រឹមឆ្នាំ២០១៩ វៀតណាមជាដៃគូពាណិជ្ជកម្មធំរបស់កម្ពុជាកម្រិតទី៥។ ក្រុមហ៊ុនរបស់វៀតណាមមានជាង២០០កំពុងតែដំណើការនៅក្នុងខេត្តចំនួន១៨ ដែលភាគច្រើនមាននៅភ្នំពេញ រតនគិរី ក្រចេះ ស្វាយរៀង សៀមរាប ព្រៃវែង និង មណ្ឌលគិរី។
