ក្រុមហ៊ុនដែកថែបរបស់ចិនមួយឈ្មោះ Mintal Group Co. Ltd គ្រោងនឹងបោះទន់វិនិយោគលើរោងចក្រផលិតលោហៈតម្លៃ ២ពាន់លានដុល្លារអាមេរិក ក្នុងតំបន់សេដ្ឋកិច្ចពិសេស Nghi Son ភាគកណ្តាលខេត្ត Thanh Hoa ប្រទេសវៀតណាម។ នេះបើតាមប្រភពព័ត៌មានពី បណ្តាញសារព័ត៌មាន Vietnamplus ចេញផ្សាយថ្ងៃអង្គារ៍។
ប្រភពដដែលឱ្យដឹងថា សេចក្តីប្រកាសនេះ ត្រូវបានពិភាក្សាក្នុងអំឡុងកិច្ចប្រជុំថ្មីមួយរវាងតំណាងក្រុមហ៊ុន Mintal និងគណៈកម្មាធិការប្រជាជនខេត្ត Thanh Hoa ដែលឋិតនៅចម្ងាយ១៥០គីឡូម៉ែត្រពីទីក្រុងហាណូយ។
ប្រភពនោះបន្ថែមថា ក្រុមហ៊ុនផលិតដែកឈានមុខគេរបស់ពិភពលោកមួយនេះ គ្រោងនឹងផលិតចេញលោហៈ Ferocrom ទម្ងន់ ១.៥ លានតោនក្នុងមួយឆ្នាំ នៅដំណាក់កាលដំបូង ហើយនឹងផលិតលោហៈឥតច្រេះ និងលោហៈគ្មានជាតិដែក សរុបទម្ងន់ ២លាន តោនក្នុងមួយឆ្នាំ នៅដំណាក់កាលទី២។
ដើម្បីបំពេញនូវគោលដៅផលិតកម្មនេះ ក្រុមហ៊ុន Mintal ត្រូវបានប៉ាន់ប្រមាណថា នឹងនាំចូលវត្ថុធាតុដើម ៨០ ភាគរយ ពីអាហ្វ្រិកខាងត្បូង ឯ ២០ ភាគរយទៀត នឹងទិញក្នុងប្រទេសវៀតណាមផ្ទាល់។
បន្ថែមពីលើនោះ ប្រសិនបើគ្រោងការវិនិយោគ ត្រូវបានរដ្ឋាភិបាលវៀតណាមទទួលយល់ព្រម ក្រុមហ៊ុន Mintal នឹងចុះកិច្ចសន្យាជួលដីទំហំ ៣០០ ហិកតា ឋិតក្នុងតំបន់សេដ្ឋកិច្ចពិសេស Nghi Son ក្បែរ កំពង់ផែ ដើម្បីសាងសង់រោងចក្រ។
ថ្លែងក្នុងកិច្ចប្រជុំ ប្រធានគណៈកម្មាធិការប្រជាជនខេត្ត Thanh Hoa លោក Nguyen Dinh Xung បានស្នើរឱ្យនាយកគ្រប់គ្រងតំបន់សេដ្ឋកិច្ចពិសេស Nghi Son អាជ្ញាធរខេត្ត និងភ្នាក់ងារពាក់ព័ន្ធផ្សេងៗ ជួយសម្របសម្រួលដល់ក្រុមហ៊ុន Mintal ក្នុងការចុះសិក្សាលើទីតាំងផ្ទាល់ និងបំពេញឯកសារពាក់ព័ន្ធផ្សេងៗឱ្យបានឆាប់រហ័ស ដើម្បីទទួលបានការសម្រេចគោលនយោបាយវិនិយោគពីគណៈកម្មាធិការឱ្យបានឆាប់ មុនវេទិកាជំរុញការវិនិយោគឆ្នាំ២០១៩ របស់ខេត្ត រៀបចំឡើង។
ទោះយ៉ាងណា លោក Xung គូសបញ្ជាក់ថា ផែនការវិនិយោគនោះក៏ត្រូវតែដាក់បញ្ចូលនូវការប្រើប្រាស់បច្ចេកវិទ្យាទំនើប និងថ្មីៗ ដើម្បីបញ្ចៀសផលប៉ះពាល់ដល់បរិស្ថានជាអតិបរមា និងអនុលោមតាមច្បាប់ការពារបរិស្ថានរបស់ប្រទេស៕
