រោងចក្រផលិតពូកនៅក្នុងខណ្ឌមានជ័យរាជធានីភ្នំពេញដែលឆេះកាលពីម្សិលមិញ មានទំហំ២០០ គុណ ២០០ម៉ែត្រ ខូចខាតទាំងស្រុង ហើយអាជ្ញាធរគ្រោងនឹងវាយកម្ចេចសំណង់ដែលនៅសល់ខ្លះកុំឱ្យបាក់បង្កគ្រោះថ្នាក់។
អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយលោក គន់ គីម ថ្លែងនៅកន្លែងកើតហេតុនៅថ្ងៃនេះថា នឹងកម្ចេចផ្នែកនៃអគារដែលសល់ពីភ្លើងឆេះនេះចេញ នៅពេលប៉ុន្មានថ្ងៃខាងមុខនេះ។
កន្លែងរោងចក្រដែលឆេះនេះ មានអគារចំនួន៣ទីតាំងគឺពីទីតាំងអគារកម្ពស់៤ជាន់ និងអគារមួយទៀតកម្ពស់៦ជាន់។ ភ្លើងបំផ្លាញខូចខាតទាំងស្រុងប៉ុន្តែផ្នែកខ្លះមិនទាន់បាក់រលំទេ។
ហេតុការណ៍ភ្លើងឆេះនេះ កើតឡើងនៅពេលរសៀលថ្ងៃសុក្រម្សិលមិញ ឆេះរយៈពេលប្រមាណ២៤ម៉ោងទើបរលត់។ ការសន្និដ្ឋានជាបឋមរបស់សមត្ថកិច្ចគឺឆេះបណ្តាលពីការឆ្លងចរន្តអគ្គិសនី។
