លោកនាយករដ្ឋមន្ត្រី ហ៊ុន សែន បានសម្រេចអនុម័ត លើគម្រោងទិញថាមពលអគ្គិសនីផលិតដោយធ្យូងថ្ម ២៤០០មេហ្កាវ៉ាត់ ពីប្រទេសឡាវដើម្បីបំពេញតម្រូវការនៅក្នុងប្រទេស។
នៅក្នុងកិច្ចប្រជុំពេញអង្គគណៈរដ្ឋមន្ត្រីកាលពីព្រឹកមិញនេះលោកនាយករដ្ឋមន្ត្រីបញ្ជាក់ថា កម្ពុជានឹងទិញ អគ្គីសនីផ្ទាល់ពីរោងចក្រផលិតអគ្គិសនីដុតធ្យូងថ្មចំនួនពីររបស់ប្រទេសឡាវ ដែលមានថាមពលសរុប២៤០០មេហ្កាវ៉ាត់ ស្ថិតក្នុងស្រុក កាលើម ខេត្តសេកុង និងស្រុក តាអយ ខេត្តសាឡាវ៉ាន។
ក្នុងកិច្ចព្រមព្រៀងអគ្គិសនីត្រូវកំណត់តម្លៃត្រឹម៧,៧សេនអាមេរិកក្នុងមួយគីឡូវ៉ាត់ម៉ោង អំឡុងពេល៣០ឆ្នាំថេ ហើយឡាវមានកាតព្វកិច្ចសាងសង់អនុស្ថានីយ និងខ្សែបញ្ជូនអគ្គីសនី៥០០គីឡូវ៉ុល ពីរោងចក្រផលិតមកព្រំដែន ចំខេត្តចំប៉ាសាក់ប្រទេសឡាវ ជាប់នឹងខេត្តស្ទឹងត្រែង ប្រទេសកម្ពុជា ខណៈភាគីខ្មែរក៏ត្រូវសាងសង់អនុស្ថានីយ និងខ្សែបញ្ជូន៥០០គីឡូវ៉ុលពីភ្នំពេញេរហូតព្រំដែនដូចគ្នាដែរ ដើម្បីទទួលយកប្រភពថាមពលទើបទិញថ្មីនេះ។
សូមបញ្ជាក់ថា សេចក្តីសម្រេចអនុម័ត លើគម្រោងទិញថាមពលអគ្គីសនីផលិតដោយធ្យូងថ្ម ២៤០០មេហ្កាវ៉ាត់ ពីប្រទេសឡាវនេះ ធ្វើឡើងមុនមួយថ្ងៃប៉ុណ្ណោះ នៃជំនួបរវាងនាយករដ្ឋមន្ត្រីប្រទេសកម្ពុជា និងប្រទេសឡាវ។ លោក ថងលូន ស៊ីស៊ូលីត នាយករដ្ឋមន្ត្រីឡាវនឹងមកបំពេញទស្សនៈកិច្ចផ្លូវការនៅប្រទេសកម្ពុជារយៈពេលពីរថ្ងៃ ពីថ្ងៃទី១២ រហូតដល់ទី១៣ នាខែកញ្ញានេះ។