លិខិតថ្កោលទោសលោក សម រង្ស៊ី ពាក់ព័ន្ធការចោទថា ប្រមាថដល់អង្គព្រះមហាក្សត្រកើតឡើងបន្តបន្ទាប់ភាគច្រើនចេញពីក្រសួងស្ថាប័នរដ្ឋក្នុងរយៈពេលតែ១ថ្ងៃមានចំនួនប្រមាណ៨០។
កាលពីយប់ថ្ងៃទី១២ខែកញ្ញា លោក សម រង្ស៊ី បានផ្តល់បទសម្ភាសន៍ជាមួយវិទ្យុអាស៊ីសេរី ពាក់ព័ន្ធតួនាទីព្រះមហាក្សត្រ ក្នុងការសម្របសម្រួលឬ ដោះស្រាយជម្លោះនយោបាយ។
លុះព្រឹកឡើងថ្ងៃនេះទី១៣ខែកញ្ញាមានប្រតិកម្មពីក្រសួងស្ថាប័នរដ្ឋថា លោក សម រង្ស៊ី បានប្រើប្រាស់ពាក្យសម្តីប្រមាថដល់អង្គព្រះមហាក្សត្រ។
ក្រសួងស្ថាប័នទាំង៨០នោះ រួមមានទាំងក្រសួងសុខាភិបាល ក្រសួងកសិកម្ម អង្គភាពប្រឆាំងអំពើពុករលួយ ជាដើម។ ក្នុងសេចក្តីថ្លែងការណ៍ថ្កោលទោសនោះភាពច្រើនក្នុងន័យប្រហាក់ប្រហែលគ្នាគឺថ្កោលទោសលោក សម រង្ស៊ី និងជំរុញឱ្យស្ថាប័នមានសមត្ថកិច្ចចាត់វិធានការ។
នៅថ្ងៃទី១៣ខែកញ្ញា អយ្យការអមសាលាដំបូងរាជធានីភ្នំពេញក៏បានសម្រេចចោទប្រកាន់ និង បញ្ជាឱ្យចាប់ខ្លួនលោក សម រង្ស៊ី ខណៈមេបក្សប្រឆាំងរូបនេះកំពុងរស់នៅក្រៅប្រទេស។
