អគ្គនាយកដ្ឋានគយ និងរដ្ឋាករ អះអាងថា សំរាមកាកសំណល់ប្លាស្ទិកចំនួន៨៣កុងតឺន័រដែលនាំចូលមកខេត្តព្រះសីហនុ ត្រូវបានក្រុមហ៊ុនដឹកចេញពីកម្ពុជាវិញអស់ហើយកាលពីចុងសប្តាហ៍មុន។
ក្នុងសេចក្តីប្រកាសព័ត៌មានចុះទី១៦ ខែកញ្ញា ឆ្នាំ២០១៩ អគ្គនាយកដ្ឋានគយ និងរដ្ឋាករកម្ពុជាបានឲ្យដឹងថា កាលពីថ្ងៃទី១៥ ខែកញ្ញា ក្រុមហ៊ុនឈ្មោះ CHUNGYUEN PLASTIC MANUFACTURE CO.,LTD បានដឹកសំរាម៦៩កុងតឺន័រដែលនៅសល់ទៅប្រទេសដើមវិញ រួចរាល់ហើយ។ ចំណែកសំរាម១៤កុងតឺន័រទៀតបានដឹកចេញកាលពីថ្ងៃទីថ្ងៃទី២០ ខែសីហា ប៉ុន្តែមិនបានបញ្ជាក់ថាដឹកទៅប្រទេសណាមួយនោះទេ។
អគ្គនាយកដ្ឋានគយ និងរដ្ឋាករកម្ពុជា បញ្ជាក់ថាម្ចាស់ក្រុមហ៊ុន CHUNGYUEN PLASTIC MANUFACTURE CO.,LTD បានបំពេញលក្ខខណ្ឌដែលបានសម្រេចដោយអាជ្ញាធរកម្ពុជាអស់ហើយ និងបង់ប្រាក់ពិន័យចូលកញ្ចប់ថវិកាជាតិគ្រប់ចំនួនផងដែរ។
វិអូឌី បានព្យាយាមសុំការបញ្ជាក់បន្ថែមពីប្រធានអគ្គនាយក នៃអគ្គនាយកដ្ឋានគយ និងរដ្ឋករកម្ពុជា លោក គុណ ញឹម តាមរយៈទូរស័ព្ទ និងTelegram ប៉ុន្តែពុំមានការឆ្លើយតប។
អគ្គនាយកដ្ឋានគយ និងរដ្ឋាករកម្ពុជា ឱ្យដឹងថាគម្រោងនាំសំរាមកាកសំណល់ប្លាស្ទិកត្រឡប់ទៅកាន់ប្រទេសដើមវិញនោះធ្លាប់សុំពន្យារទៅថ្ងៃទី២៥ខែតុលា ដោយមូលហេតុអាកាសធាតុ និងការកកស្ទះទំនិញច្រើន។
ក្រុមហ៊ុន CHUNGYUEN PLASTIC MANUFACTURE CO.,LTD បាននាំចូលសំរាមទាំង៨៣កុងតឺន័រមកកម្ពុជាចាប់ពីខែកញ្ញាឆ្នាំ២០១៨ ដល់ខែមករាឆ្នាំ២០១៩ ហើយក្រុមហ៊ុននេះត្រូវបានអាជ្ញាធរកម្ពុជាពិន័យជាប្រាក់ជិត ២៥៥,០០០ ដុល្លារ។
កាលពីថ្ងៃទី១៧ ខែកក្កដា សមត្ថកិច្ចកម្ពុជា បានបើកទូកុងទឺន័រក្នុងកំពង់ផែស្វយ័តខេត្តព្រះសីហនុ រកឃើញសំរាមប្លាស្ទិកចំនួន ៨៣កុងទឺន័រ ដែលមានទម្ងន់ជិត ១៦០០តោន។ អាជ្ញាធរកម្ពុជា បានអះអាងថា សំរាមទាំងនោះមានប្រភពមកពីសហរដ្ឋអាមេរិក និងកាណាដា។
ទោះយ៉ាងណាក៏ដោយ ភាគីកាណាដា មិនបានទទួលស្គាល់ថាសំរាមនោះជារបស់ខ្លួនទេ។ អ្នកនាំពាក្យក្រសួងបរិស្ថាននិងបម្រែប្រួលអាកាសធាតុកាណាដាកាលពីថ្ងៃទី៦ ខែកញ្ញា បានឆ្លើយប្រាប់វីអូឌីតាមអ៊ីមែលថាកាកសំណល់ដែលគេនាំចេញទៅកាន់ប្រទេសកម្ពុជាមិនមែនមានប្រភពចេញពីប្រទេសកាណាដាទេ ហើយដូច្នេះនឹងគ្មានការដឹកជញ្ជូនត្រឡប់ទៅប្រទេសកាណាដាវិញនោះទេ។ ចំណែកលោក Arend Zwartjes អ្នកនាំពាក្យស្ថានទូតអាមេរិកប្រចាំក្រុងភ្នំពេញកាលពីថ្ងៃចន្ទសប្តាហ៍មុនបានបដិសេធធ្វើអត្ថាធិប្បាយថាតើសំរាមទាំងនោះជារបស់ខ្លួនឬមិនមែន៕