ប្រជាពលរដ្ឋខ្មែរនឹងទទួលបានឱកាសជិះរថភ្លើងដោយឥតគិតថ្លៃអំឡុងពិធីបុណ្យភ្ជុំបិណ្ឌចំនួន៦ថ្ងៃ ពីថ្ងៃទី២៥ ដល់៣០ ខែកញ្ញា។
សេចក្តីប្រកាសព័ត៌មានរបស់ក្រសួងសាធារណៈការ និងដឹកជញ្ជូនកាលពីថ្ងៃម្សិលមិញ បានបញ្ជាក់ថា ពលរដ្ឋអាចជ្រើសរើសធ្វើដំណើរតាមរយៈរថភ្លើងចំនួនបីខ្សែរ ទី១ ទិសដៅពីភ្នំពេញទៅពោធិ៍សាត់ ចេញដំណើរវេលាម៉ោង៧:៣០ព្រឹក និងចេញពីពោធិ៍សាត់ត្រលប់មកភ្នំពេញនាវេលាម៉ោង១:២០នាទីរសៀល ទី២ ពីភ្នំពេញទៅព្រះសីហនុចេញដំណើរនាម៉ោង៧ព្រឹក និងម៉ោង៧យប់ ហើយចេញពីព្រះសីហនុត្រប់មកភ្នំពេញនាវេលាម៉ោង៧ព្រឹក និង៤ល្ងាច ឯទី៣ ពីប៉ោយប៉ែតទៅពោធិ៍សាត់នាម៉ោង៧ព្រឹក និងទិសដៅពីពោធិ៍សាត់មកប៉ោយប៉ែតចេញដំណើរនាម៉ោង១:៣០រសៀល។
ការផ្តល់សេវាដឹកជញ្ជូនពលរដ្ឋដោយឥតគិតថ្លៃនារដូវភ្ជុំបិណ្ឌ រដ្ឋបាលរាជធានីភ្នំពេញក៏បានសម្រេចផ្តល់រថយន្ដក្រុងចំនួន ១២០ គ្រឿង ដើម្បីដឹកជញ្ជូនប្រជាពលរដ្ឋដោយឥតគិតថ្លៃរយៈពេល ៥ ថ្ងៃ ចាប់ពីថ្ងៃទី ២៦ ដល់ថ្ងៃទី ៣០ ខែ កញ្ញា ឆ្នាំ ២០១៩ផងដែរ៕
