លោកនាយករដ្ឋមន្ត្រី ហ៊ុន សែន បានអំពាវនាវទៅម្ចាស់ផ្ទះជួលកុំឲ្យឡើងថ្លៃបន្ទប់ខ្ពស់ពេក ដែលអាចប៉ះពាល់ដល់ជីវភាពរបស់កម្មករ-កម្មការិនី។
ថ្លែងក្នុងពិធីចែកសញ្ញាបត្រជូននិស្សិតនៅកោះពេជ្យនាព្រឹកនេះ លោក ហ៊ុន សែន បានអំពាវនាវជាថ្មីទៀតដល់ម្ចាស់ផ្ទះជួលទាំងអស់កុំឲ្យឡើងថ្លៃបន្ទប់ជួលខ្ពស់ពេក ដោយថា នៅឆ្នាំ២០២០ប្រាក់ឈ្នួលគោលរបស់កម្មករនយោជិតឡើងបានតែ៨ដុល្លារប៉ុណ្ណោះ។
លោក ហ៊ុន សែន ក៏បានប្រាប់ទៅមន្ត្រីក្រោមឱវាទឲ្យពិនិត្យមើលការបញ្ចុះតម្លៃទឹក ភ្លើងផងដើម្បីជួយសម្រួលដល់ការរស់នៅរបស់កម្មករនយោជិត។
លោកបន្ថែមថា «បើ[ម្ចាស់ផ្ទះជួល]មិនឡើងកាន់តែល្អ។ បើសិនជាឡើង កុំឲ្យលើស២ដុល្លារ។ អីចឹងសុំការយោកយល់ពីសំណាក់កម្មក កម្មការិនីផង។ ហើយសុំការយោគយល់ពីម្ចាស់ផ្ទះជួលផង ព្រោះអត់អតិផរណាអីទេ សម្រាប់ម្ចាស់ជួលនោះ»។
កាលពីថ្ងៃទី២០ ខែកញ្ញាឆ្នាំ២០១៩ ក្រសួងការងារ និងបណ្ដុះបណ្ដាលវិជ្ជាជីវៈប្រកាសថា ប្រាក់ឈ្នួលអប្បបរមារបស់កម្មករនិយោជិតផ្នែកវាយនភណ្ឌកាត់ដេរ និងផលិតស្បែកជើងសម្រាប់ឆ្នាំ២០២០ គឺ១៩០ដុល្លារក្នុងមួយខែ ដែលត្រូវអនុវត្តន៍ចាប់ពីថ្ងៃទី១ ខែមករា ឆ្នាំ២០២០តទៅ៕
