លោកនាយករដ្ឋមន្ត្រី ហ៊ុន សែន ប្រកាសថា នៅឆ្នាំនេះទោះបីជាកម្ពស់ទឹកទន្លេទាបសល់ត្រឹម១ម៉ែត្រ ក៏ត្រូវរៀបចំពិធីបុណ្យអុំទូកដែរ ដោយថា ដើម្បីយកឈ្នះលោក សម រង្ស៊ី ដែលប្រកាសចូលស្រុកនៅថ្ងៃទី៩ ខែវិច្ឆិកា។
ថ្លែងក្នុងពិធីចែកសញ្ញាបត្រជូននិស្សិតនៅកោះពេជ្យនាព្រឹកនេះ លោក ហ៊ុន សែន មានប្រសាសន៍ថា ជារៀងរាល់ឆ្នាំឲ្យតែកម្ពស់ទឹកទន្លេឡើងខ្ពស់ពេក និងទាបពេកនោះ គឺរដ្ឋាភិបាលមិនរៀបចំពិធីបុណ្យអុំទូកនោះទេ ប៉ុន្តែសម្រាប់ឆ្នាំ២០១៩នេះ បើទោះបីកម្ពស់ទឹកទន្លេស្រកទាបនៅសល់ត្រឹមតែ១ម៉ែត្រ ពិធីបុណ្យអុំទូកនៅតែរៀបចំឡើង ដើម្បីប្រឆាំងលោក សម រង្ស៊ី ដែលលោកថា គ្រោងឡើងមកផ្តួលរំលំរដ្ឋាភិបាលនៅថ្ងៃទី៩ ខែវិច្ឆិកា។
លោកបន្ថែមថា «បើយើងមិនអុំទូកវា [លោក សម រង្ស៊ី ] ថា យើងចាញ់ ១ម៉ែត្រ មានតែ១ម៉ែត្រក៏យើងអុំដែរ ដើម្បីសំពងក្បាល អាហែង។ ខ្ញុំបន់ឲ្យតែដល់ថ្ងៃហ្នឹងទេ»។
អតីតប្រធានគណបក្សប្រឆាំងលោក សម រង្ស៊ី បានប្រកាសម្តងហើយម្តងទៀត អំពីផែនការវិលត្រឡប់ចូលប្រទេសកម្ពុជាវិញឲ្យខានតែបាននៅថ្ងៃទី៩វិច្ឆិកា ដោយថា ដើម្បីមករំដោះប្រទេសជាតិជូនរាស្ត្រ ហើយបណ្តេញលោកនាយករដ្ឋមន្ត្រី ហ៊ុន សែន ចេញពីអំណាច។ ខណៈលោក សម រង្ស៊ី ប្រកាសចូលស្រុកវិញ ហើយលោកហ៊ុន សែន ប្រកាសចាត់វិធានការនេះ អតីតសកម្មជន និងមន្ត្រីសង្គ្រោះជាតិត្រូវសមត្ថកិច្ចចាប់ខ្លួនជាបន្តបន្ទាប់ជុំវិញការរៀបចំផែនការទទួលលោក សម រង្ស៊ី។