សហជីពប្រចាំនៅកាស៊ីណូណាហ្គា វើលដ៍ បានអំពាវនាវទៅរដ្ឋាភិបាលឱ្យសម្របសម្រួលវិវាទការងាររបស់ខ្លួនជាមួយភាគីក្រុមហ៊ុនកាស៊ីណូមួយនេះ បន្ទាប់ពីមេដឹកនាំសហជីពមួយនេះ ត្រូវបានបញ្ឈប់ពីការងារ។
នៅក្នុងសេចក្តីថ្លែងការរបស់សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុន Naga World ចេញថ្ងៃទី០២ តុលា ២០១៩ ភាគីសហជីព បានប្រកាសទៀតថា ពួកគេនៅតែបន្តរក្សាជំហរទាមទារឱ្យខាងភាគីតំណាងក្រុមហ៊ុនពិចារណាលើលទ្ធភាពតំឡើងប្រាក់ឈ្នួល និងធ្វើឱ្យប្រសើរឡើងនូវលក្ខខណ្ឌការងារសម្រាប់ពួកគេ ដោយតម្កល់ផលប្រយោជន៍រួមរវាងភាគីទាំងពីរ។
ក្នុងលិខិតដដែល សហជីពដែលតំណាងឱ្យបុគ្គលិកកំពុងបម្រើការងារជាង ៤ពាន់នាក់នៅក្រុមហ៊ុនកាស៊ីណូខាងលើ អំពាវនាវដល់ភាគីពាក់ព័ន្ធ និងក្រសួងការងារ និងបណ្តុះបណ្តាលវិជ្ជាជីវៈ ជួយស្វែងរកការដំណោះស្រាយសមរម្យមួយសម្រាប់ពួកគេ ក្នុងជំនួបផ្សះផ្សារ ដែលគ្រោងនឹងធ្វើឡើងនៅថ្ងៃស្អែក រវាងភាគីតំណាងសហជីព និងភាគីតំណាងក្រុមហ៊ុន។
ប្រធានសហជីព កញ្ញា ឈឹម ស៊ីថរ ត្រូវតំណាងក្រុមហ៊ុន Naga World ព្យួរការងារក្នុងរយៈពេលមិនកំណត់កាលពីថ្ងៃទី២០ ខែសីហាកន្លងមក បន្ទាប់ពីកញ្ញាដឹកនាំបុគ្គលិកក្រុមហ៊ុនធ្វើការតវ៉ាទាមទារដំឡើងប្រាក់ឈ្នួល និងលក្ខខណ្ឌការងារសមរម្យ៕