សកម្មជនបក្សប្រឆាំងចំនួន៥នាក់ទៀត ត្រូវបានសាលាដំបូងរាជធានីភ្នំពេញចោទប្រកាន់ពីបទ «រួមគំនិតក្បត់» ពាក់ព័ន្ធនឹងផែនការនៃការវិលត្រឡប់មកកម្ពុជារបស់អតីតមេបក្សប្រឆាំង លោក សម រង្ស៊ី។
ក្នុងសេចក្តីប្រកាសព័ត៌មានចុះថ្ងៃទី៧ ខែតុលានេះ អ្នកនាំពាក្យសាលាដំបូងរាជធានីភ្នំពេញ ឱ្យបានដឹងថា សកម្មជនបក្សប្រឆាំងមានឈ្មោះ គ្រុយ សុខេមរិទ្ធ ឈ្មោះ សេង ខន ឈ្មោះ ទិត្យ សុផាត ឈ្មោះ វឿង សំណាង ឈ្មោះ ឃិន សុខ ហៀង ត្រូវបានតុលាការចោទប្រកាន់ពីបទ «រួមគំនិតក្បត់» តាមមាត្រា ៤៥៣ នៃក្រមព្រហ្មទណ្ឌ។
អ្នកនាំពាក្យសាលាដំបូងរាជធានីភ្នំពេញ អះអាងថា សកម្មជនបក្សប្រឆាំងទាំង ៥នាក់នេះ បានធ្វើសកម្មភាពកៀរគរបំផុសប្រជាពលរដ្ឋ និងមានផែនការដឹកនាំក្រុមរបស់ខ្លួនចូលផែនការ នៃការវិលត្រឡប់មកកម្ពុជារបស់លោក សម រង្ស៊ី នៅថ្ងៃទី៩ វិច្ចិកាខាងមុខនេះ។
ក្នុងសេចក្តីប្រកាសព័ត៌មានដដែលនេះ អ្នកនាំពាក្យសាលាដំបូងរាជធានីភ្នំពេញ បញ្ជាក់ថា អ្នកពាក់ព័ន្ធនឹងការគាំទ្រ ឬចូលរួមជាមួយផែនការវិលត្រឡប់របស់លោក សម រង្ស៊ី គឺប្រឈមនឹងការចោទប្រកាន់ពីបទ «រួមគំនិតក្បត់» ដែលអាចមានទោសពី ៥ឆ្នាំទៅ ១០ឆ្នាំ តាមមាត្រា ៤៥៣ នៃក្រមព្រហ្មទណ្ឌ។
ប៉ុន្តែ តុលាការមួយនេះ អះអាងថា ប្រសិនបើអ្នកទាំងនោះចូលមកសារភាពទាន់ពេលវេលា ពួកគេនឹងត្រូវបានលើកលែងឱ្យរួចផុតពីទោស។
កាលពីម្សិលមិញនេះ សមត្ថកិច្ចខេត្តបន្ទាយមានជ័យបានចាប់ខ្លួនសមាជិកអតីតក្រុមប្រឹក្សាឃុំរបស់គណបក្សប្រឆាំងម្នាក់នៅខេត្តត្បូងឃ្មុំ គឺអ្នកស្រី មាន ឡា ខណៈសកម្មជនបក្សប្រឆាំងរូបនេះព្យាយាមឆ្លងទៅប្រទេសថៃ។
គិតត្រឹមថ្ងៃ០៧ ខែតុលានេះ អតីតសកម្មជន និងអ្នកគាំទ្របក្សប្រឆាំង ៤៣នាក់ហើយ ត្រូវបានសមត្ថកិច្ចចាប់ខ្លួន និងត្រូវបានតុលាការចោទប្រកាន់ពីបទ «រួមគំនិតក្បត់» ពាក់ព័ន្ធទៅនឹងការបង្ហាញជំហរគាំទ្រដំណើរវិលត្រឡប់របស់លោក សម រង្ស៊ីមកកម្ពុជាវិញ៕
