នាយករដ្ឋមន្រ្តី ហ៊ុន សែន សម្រចដកថ្លៃសេវាប្រមូលសំរាមរបស់ក្រុមហ៊ុន ស៊ិនទ្រី នៅក្នុងរាជធានីភ្នំពេញ ចេញពីវិក្កយបត្រថ្មីរបស់អគ្គិសនីកម្ពុជាចាប់ពីថ្ងៃទី១ ខែមករា ឆ្នាំ២០២០។
ការសម្រេចបែបនេះ ធ្វើឡើងបន្ទាប់ពីលោកប្រកាសដកយកក្រុមហ៊ុនប្រមូលសំរាមស៊ិនទ្រីមកគ្រប់គ្រងជាបណ្ដោះអាសន្ន ដោយអះអាងថា ដើម្បីជំរុញការធ្វើកំណែទម្រង់ពីការសម្អាតទីក្រុង។
លោកនាយករដ្ឋមន្ត្រីហ៊ុន សែន បានសរសេរនៅលើហ្វេសប៊ុករបស់លោកកាលពីថ្ងៃទី២២តុលា ម្សិលមិញនេះថា ក្រោយពីទទួលបានព័ត៌មានពីប្រជាពលរដ្ឋមួយចំនួននៅរាជធានីភ្នំពេញថា ក្រុមហ៊ុនស៊ិនទ្រីផ្តល់ផលវិបាកច្រើនក្នុងការប្រមូលសំរាម។ ករណីនេះ លោកសម្រេចដកថ្លៃសេវាប្រមូលសំរាមរបស់ ក្រុមហ៊ុន ស៊ិនទ្រី នៅក្នុងរាជធានីភ្នំពេញ ចេញពីវិក្កយបត្រថ្មីរបស់អគ្គិសនីកម្ពុជា ចាប់ពីថ្ងៃទី០១ ខែមករា ឆ្នាំ២០២០។
លោក ហ៊ុន សែន បញ្ជាក់ថា យន្តការនៃការយកថ្លៃសេវាប្រមូលសំរាមទៅថ្ងៃមុខ នឹងត្រូវប្រើយន្តការផ្សេងជំនួសវិញ ដែលកិច្ចការនេះ រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ អូន ព័ន្ធមុនីរ័ត្ន ជាអ្នកប្រជុំ និងដោះស្រាយនាពេលឆាប់ៗនេះ។
គួររំឮកថា ក្រុមហ៊ុនស៊ិនទ្រី បានទទួលសិទ្ធិតែម្នាក់ឯងពីរដ្ឋាភិបាល សម្រាប់ទទួលខុសត្រូវ លើការប្រមូលសំរាម សម្អាតទីក្រុង ចាប់ពីឆ្នាំ១៩៩៦មក។
បើតាមនាយករដ្ឋមន្ត្រី ការចុះហត្ថលេខាផ្តល់សិទ្ធិឲ្យក្រុមហ៊ុនស៊ិនទ្រីពេលនោះ សំរាមមានតែត្រឹម៥០០តោនប៉ុណ្ណោះក្នុង១ថ្ងៃរីឯទំហំទីក្រុងភ្នំពេញវិញមានតែជាង៣០០គីឡូម៉ែត្រការ៉េ។ លោកបញ្ជាក់ថា ឥឡូវនេះ សំរាម បានកើនឡើងជាង៣០០០តោនក្នុង១ថ្ងៃហើយទំហំទីក្រុងបានកើនឡើងជាង៦០០គីឡូម៉ែត្រការ៉េ។ លោកមានប្រសាសន៍ថារដ្ឋាភិបាលត្រូវធ្វើកំណែទម្រង់៕
