ក្រសួងមហាផ្ទៃ បានបញ្ជាទៅមន្ត្រីក្រោមឱវាទទាំងអស់ឲ្យពង្រឹងសន្តិសុខសណ្តាប់ធ្នាប់ក្នុងដែនសមត្ថកិច្ចរបស់ខ្លួនចាប់ពីដើមខែវិច្ឆិកានេះ រហូតដល់ថ្ងៃបញ្ចប់ពិធីបុណ្យអុំទូក ដើម្បីទប់ស្កាត់ចលនាវិលចូលស្រុករបស់លោកសមរង្ស៊ី។
ក្នុងលិខិតចុះថ្ងៃទី៣០ ខែតុលាឆ្នាំ២០១៩ ក្រសួងមហាផ្ទៃបញ្ជាទៅអភិបាលរាជធានី និងខេត្តត្រូវពង្រឹងការគ្រប់គ្រងសន្តិសុខសណ្តាប់ធ្នាប់សាធារណៈ និងសុវត្ថិភាពសង្គមជូនប្រជាពលរដ្ឋក្នុងអំឡុងពិធីរំលឹកខួបលើកទី៦៦ នៃទិវាបុណ្យឯករាជ្យជាតិ៩ វិច្ឆិកា និងពិធីបុណ្យអុំទូក។
ក្នុងលិខិតដដែលនេះ ក្រសួងមហាផ្ទៃបានលើកឡើងថា លោកសមរង្ស៊ី និងបក្សពួក ដែលក្រសួងមហាផ្ទៃចាត់ទុកថា ជាចលនាក្រុមឧទ្ទាមក្រៅច្បាប់មានផែនការធ្វើរដ្ឋប្រហារ ដើម្បីផ្តួលរំលំរដ្ឋាភិបាលស្របច្បាប់តាមរយៈការប្រកាសវិលចូលស្រុកវិញចំពេលដែលកម្ពុជាប្រារព្វពីបុណ្យជាតិនោះដែរ។
ក្រសួងមហាផ្ទៃបានដាក់ចេញវិធានការចំនួន៨ចំណុចឲ្យអភិបាលរាជធានីខេត្តអនុវត្តន៍ ដោយតម្រូវឲ្យអភិបាលរាជធានីខេត្តទាំងនោះត្រូវមានវត្តមាននៅក្នុងរាជធានីខេត្តរបស់ខ្លួនជាប្រចាំរហូតចាប់ពីធីបុណ្យជាតិទាំងពីនោះ ហើយត្រូវដឹកនាំកម្លាំងសមត្ថកិច្ចដើម្បីត្រៀមទប់ស្កាត់ និងបង្រ្កាបបទល្មើសនានាដែលអាចកើតមាន។
ក្នុងលិខិតដដែលនេះ ក្រសួងមហាផ្ទៃក៏បញ្ជាឲ្យមន្ត្រីក្រោមឱវាទរបស់ខ្លួនតាមគោលដៅនីមួយៗ ត្រូវដឹកនាំកម្លាំងសមត្ថកិច្ច តាមដានសភាពការណ៍សកម្មភាពចលនាវិលចូលស្រុករបស់លោកសមរង្ស៊ី និងអប់រំប្រជាពលរដ្ឋកុំឲ្យចូលរួមជាមួយចលនានេះផងដែរ។
ប៉ុន្តែតាមវីដេអូរយៈពេលជាង៣នាទីដែលបង្ហោះលើហ្វេសប៊ុកកាលពីថ្ងៃទី២៩ ខែតុលាឆ្នាំ២០១៩ លោក សម រង្ស៊ី បានប្រកាសនឹងចូលស្រុកតាមការគ្រោងទុកនៅថ្ងៃទី៩ វិច្ជិកានេះ ទោះត្រូវបូជាជីវិតក៏ដោយ ដោយថាដើម្បីសង្គ្រោះប្រជាធិបតេយ្យ៕
