កម្លាំងប្រដាប់អាវុធនៅខេត្តបន្ទាយមានជ័យនៅថ្ងៃសុក្រស្អែកនេះ នឹងចល័តដើម្បីធ្វើការហ្វឹកហាត់បង្កើនការថែរក្សាសន្តិសុខ សុវត្ថិភាព និងសណ្តាប់ធ្នាប់សាធារណៈ។
តាមសេចក្តីប្រកាសព័ត៌មានរបស់រដ្ឋបាលខេត្តបន្ទាយមានជ័យ ចុះថ្ងៃទី៣០ ខែតុលា ឱ្យដឹងថាខេត្តមួយនេះ នឹងធ្វើការចល័តកម្លាំងប្រដាប់អាវុធពីទីបញ្ជាការទិសទី១ខេត្ត និងបញ្ជាការកងរាជអាវុធហត្ថខេត្ត ដើម្បីហ្វឹកហាត់រួមគ្នាជាមួយកម្លាំងនគរបាលខេត្ត។
ប្រភពដដែលឱ្យដឹងទៀតថា ការចល័តនឹងចាប់ផ្តើមនៅម៉ោង ៧:០០នាទីព្រឹក ថ្ងៃទី០១ ខែវិច្ឆិកា ឆ្ពោះទៅទីតាំងហ្វឹកហាត់នៅស្នងការដ្ឋាននគរបាលខេត្ត ស្ថិតនៅផ្លូវជាតិលេខ៥ ភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។
វីអូឌី មិនអាចសុំការបញ្ជាក់ពីអភិបាលខេត្តបន្ទាយមានជ័យ លោក អ៊ុំ រាត្រី ថាការចល័តកងកម្លាំងខេត្តដើម្បីហ្វឹកហាត់នៅថ្ងៃស្អែក ពាក់ព័ន្ធនឹងផែនការវិលត្រឡប់របស់អតីតមេបក្សប្រឆាំង លោក សម រង្ស៊ី ឬយ៉ាងណាទេនៅថ្ងៃនេះ ដោយលោកថា កំពុងជាប់ប្រជុំ។
យ៉ាងណា អភិបាលក្រុងសិរីសោភ័ណ លោក ហ៊ឹល រ៉ាយ៉ា បានប្រាប់ វីអូឌី តាមទូរសព្ទថា ការហ្វឹកហាត់នោះមិនពាក់ព័ន្ធនឹងការវិលចូលស្រុករបស់លោក សម រង្ស៊ី នៅថ្ងៃ ៩ ខែវិច្ឆិកានោះទេ។
លោក ហ៊ឹល រ៉ាយ៉ា មានប្រសាសន៍ថា៖«ខ្ញុំគិតថាដូចជាមិនទេ ដូចជាអត់ទេ។ បាទជារឿង២ដាច់ដោយឡែក»។
នៅក្នុងលិខិតចុះថ្ងៃទី៣ តុលា២០១៩ ក្រសួងមហាផ្ទៃបានដាក់ចេញវិធានការចំនួន៨ចំណុច ដោយក្នុងនោះ ខាងក្រសួងបញ្ជាឱ្យកម្លាំងសមត្ថកិច្ចតាមបណ្តារាជធានី-ខេត្តទាំងអស់ពង្រឹងសន្តិសុខសណ្តាប់ធ្នាប់ក្នុងដែនសមត្ថកិច្ចរបស់ខ្លួនចាប់ពីដើមខែវិច្ឆិកា រហូតដល់ថ្ងៃបញ្ចប់ពិធីបុណ្យអុំទូក ដើម្បីទប់ស្កាត់ចលនាវិលចូលស្រុករបស់លោកសមរង្ស៊ី៕
