លោក សម រង្ស៊ី គ្រោងធ្វើដំណើរតាមក្រុមហ៊ុនដឹកអ្នកដំណើរតាមយន្តហោះឈ្មោះ Thai Airways International ពីប្រទេសបារាំងឆ្ពោះទៅកាន់ទីក្រុងបាងកកប្រទេសថៃ នៅថ្ងៃទី៧ ខែវិច្ឆិកា។
នៅលើទំព័រហ្វេសប៊ុកលោក សម រង្ស៊ី នៅថ្ងៃពុធនេះ បានបង្ហាញសំបុត្រយន្តហោះដែលកក់ទុករួចហើយមានឈ្មោះលោក សម រង្ស៊ី ជាអ្នកដំណើរ ចេញពីទីក្រុងប៉ារីសប្រទេសបារាំងនៅម៉ោង១២ និង៣០នាទី ថ្ងៃទី៧ ដល់ទីក្រុងបាងកកប្រទេសថៃ នៅថ្ងៃទី៨ ខែវិច្ឆិកា ម៉ោង ៦ និង ០០នាទី។
នៅលើទំព័រហ្វេសប៊ុកនេះ លោក សម រង្ស៊ី ក៏បញ្ជាក់ទៀតថា ក្រោយពេលធ្វើដំណើរដល់ប្រទេសថៃនៅថ្ងៃទី៨ ហើយលោកបន្តដំណើរចូលកម្ពុជានៅថ្ងៃទី៩ ខែវិច្ឆិកា។
ទោះយ៉ាងណា រដ្ឋាភិបាលកម្ពុជាបានដាក់ចេញវិធានការហាមឃាត់ក្រុមហ៊ុនដឹកអ្នកដំណើរចំនួន៤៧ មិនឱ្យដឹកលោក សម រង្ស៊ី ចូលប្រទេសកម្ពុជាវិញទេ ចំណែកច្រកព្រំដែនកម្ពុជាថៃក៏មានការដាក់កម្លាំងទ័ពយាមតឹងរ៉ឹងមិនឱ្យលោក សម រង្ស៊ី ចូលកម្ពុជាដែរ។