ប្រធានស្តីទីអតីតគណបក្សសង្គ្រោះជាតិ បានប្រកាសនៅល្ងាចថ្ងៃនេះថា គម្រោងវិលត្រលប់ចូលប្រទេសកម្ពុជាវិញរបស់លោកត្រូវពន្យារពេលបន្តិច ដោយសារតែក្រុមហ៊ុនអាកាសចរណ៍ថៃមិនអនុញ្ញាតឲ្យលោកឡើងជិះយន្តហោះទៅក្រុងបាងកក។
ទោះយ៉ាងណាក៏ដោយ តាមរយៈការផ្សាយផ្ទាល់លើទំព័រហ្វេសប៊ុករបស់ខ្លួន លោក សម រង្ស៊ី បានបញ្ជាក់ថាគម្រោងមាតុភូមិនិវត្តន៍របស់លោកនឹងមិនលុបចោលនោះទេ ប៉ុន្តែ លោកមិនបានប្រាប់ថាលោកពន្យារពេលវិលត្រលប់ចូលកម្ពុជាដល់ពេលណានោះទេ។ លោក សម រង្ស៊ី បន្តថា ពេលនេះក្រុមការងាររបស់លោកកំពុងរៀបចំទិញសំបុត្រយន្តហោះថ្មីរបស់ក្រុមហ៊ុនផ្សេងទៀតទៅកាន់ប្រទេសជិតខាងមួយរបស់កម្ពុជា ដែលលោកមិនបានបញ្ជាក់ថាជាប្រទេសណានោះទេ។
តាមគម្រោង លោក សម រង្ស៊ី នឹងធ្វើដំណើរចាកចេញពីព្រលានយន្តហោះ Charles De Gaulle ប្រទេសបារាំងមកកាន់ទីក្រុងបាងកកប្រទេសថៃតាមរយៈក្រុមហ៊ុនអាកាសចរណ៍ Thai Airways នៅថ្ងៃទី៧ ខែវិច្ឆិកានេះ ដើម្បីចូលរួមជាមួយសកម្មជនរបស់អតីតគណបក្សសង្រ្គោះជាតិធ្វើដំណើរចូលប្រទេសកម្ពុជាវិញនៅថ្ងៃបុណ្យឯករាជ្យជាតិខាងមុខ៕