មន្ទីរសាធារណការ និងដឹកជញ្ជូន ប្រកាសបិទរថយន្តមិនឱ្យចូលរាជធានីភ្នំពេញ ចាប់ពីម៉ោង ១០:០០ព្រឹក រហូតដល់ម៉ោង២៣:៣០នាទី ពីថ្ងៃទី១០ រហូតដល់ថ្ងៃទី១២ ខែវិច្ឆិកា ខាងមុខនេះ។
ក្នុងសេចក្ដីប្រកាសព័ត៌មានចុះថ្ងៃទី៧ ខែវិច្ឆិកា ឆ្នាំ២០១៩ របស់មន្ទីរសាធារណការ និងដឹកជញ្ជូនខេត្តកណ្ដាល ឱ្យដឹងថា អាជ្ញាធរនឹងបិទផ្លូវជាតិមួយចំនួនដោយមិនឱ្យយានយន្តគ្រប់ប្រភេទការធ្វើចរាចរណ៍ចូលក្នុងរាជធានីភ្នំពេញរយៈពេល៣ ថ្ងៃ ពោលគឺចាប់ពីថ្ងៃទី១០ រហូតដល់ថ្ងៃទី១២ ខែវិច្ឆិកា ខាងមុខនេះ ដោយថា ដើម្បីអបអរសាទរព្រះរាជពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ។
ផ្លូវជាតិ និងកំពង់ចម្លងដែលក្រសួងបិទនោះរួមមាន ផ្លូវជាតិលេខ១, ផ្លូវជាតិលេខ២, ផ្លូវជាតិលេខ៣, ផ្លូវជាតិលេខ៤, ផ្លូវជាតិលេខ៥, ផ្លូវជាតិលេខ៦ និងកំពង់ចម្លងអរិយក្សត្រ ដែលត្រូវបិទចាប់ពីម៉ោង ១០:០០ព្រឹក រហូតដល់ម៉ោង២៣:៣០ នាទី ដោយមិនអនុញ្ញាតឱ្យយានយន្តចូលរាជធានីឡើយ លើកលែងតែរថយន្តសង្គ្រោះបន្ទាន់ និងរថយន្តមន្ត្រីមានសមត្ថកិច្ចប៉ុណ្ណោះ៕