សហរដ្ឋអាមេរិកបានចេញលិខិតអបអរសាទរកម្ពុជាក្នុងទិវាបុណ្យឯករាជ្យជាតិ៩វិច្ឆិកា ឆ្នាំ២០១៩ ដោយសង្ឃឹមថា កម្ពុជានឹងយកទិវានេះដើម្បីផ្សះផ្សាជាតិ និងធ្វើកិច្ចសន្ទនាដោយសន្តិវិធី។
ក្នុងលិខិតចុះថ្ងៃទី៧ ខែវិច្ឆិកា រដ្ឋមន្ត្រីការបរទេសអាមេរិកលោក Mike Pompeo បានលើកឡើងថា ក្នុងនាមសហរដ្ឋអាមេរិក លោកសូមអបអរប្រជាជនកម្ពុជាក្នុងខួប៦៦ឆ្នាំនៃបុណ្យឯករាជ្យ៩វិច្ឆិកា ដោយសង្ឃឹមថាកម្ពុជានឹងយកថ្ងៃនេះផ្ដោតលើការផ្សះផ្សាជាតិ ការចរចារដោយសន្ដិវិធី នាំមកនូវប្រជាធិបតេយ្យ ការអភិវឌ្ឍសេដ្ឋកិច្ច និងសង្គម។ លោកលើកឡើងថា៖
«យើងអបអរកិច្ចសហប្រតិបត្តិការរវាងសហរដ្ឋអាមេរិក និងកម្ពុជា ក្នុងការកសាងប្រទេសកម្ពុជាដែលរីកចម្រើនរុងរឿង ប្រជាធិបតេយ្យ និងឯករាជ្យ»។
ក្រោយរដ្ឋាភិបាលកម្ពុជាចាប់ខ្លួនលោក កឹម សុខា និងរំលាយបក្សប្រឆាំងនាឆ្នាំ២០១៧ ជាមួយការប្រកាសចូលស្រុករបស់លោក សម រង្ស៊ី នៅថ្ងៃទី៩វិច្ឆិកា ហើយលោក ហ៊ុន សែន ប្រកាសបង្ក្រាបនោះ វាកាន់តែធ្វើឱ្យស្ថានភាពដែលកំពុងប្រះស្រាំស្រាប់កាន់តែធ្ងន់ធ្ងរឡើង ខណៈអ្នកវិភាគជម្រុញដល់ដៃគូរបដិបក្ខទាំងពីរគួរងាកមករកតុចរចាវិញ ដើម្បីផ្សះផ្សាជាតិដែលរងការបែកបាក់នេះ ៕