កូនប្រុសច្បងលោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ាណែត លើកឡើងថា ក្នុងពិធីបុណ្យអុំទូកឆ្នាំនេះប្រជាពលរដ្ឋចូលរួមអបអរកុះករ ហើយថា នេះជាអ្វីដែលពួកគាត់ចង់បានគឺរស់នៅជុំគ្នាដោយមិនប្រកាន់និន្នាការ ឬសាសនា។
ក្នុងពិធីពន្លត់ភ្លើងជ័យនៅព្រឹកនេះ លោក ហ៊ុន ម៉ាណែត បានផ្សព្វផ្សាយរូបថតលោកជាមួយរដ្ឋមន្ត្រីក្រសួងការពារជាតិ លោក ទៀ បាញ់ និង លោក វង្ស ពិសេន អគ្គមេបញ្ជាការកងយោធពលខេមរភូមិន្ទ ភ្ជាប់ជាមួយសារជាអត្ថបទ។
ក្នុងសារជាអត្ថបទនោះ លោក ហ៊ុន ម៉ាណែត លើកឡើងថា ពិធីបុណ្យអុំទូកឆ្នាំនេះ ទាំងនៅរាជធានីភ្នំពេញ និងនៅតាមខេត្តនានាមានពលរដ្ឋចូលរួមអបអរសប្បាយរីករាយច្រើន។ លោក បន្តថា នេះជាអ្វីដែលពលរដ្ឋចង់បាន។ លោក ហ៊ុន ម៉ាណែត៖
«នេះគឺជាអ្វីដែលជាតិ និងប្រជាជនខ្មែរគ្រប់រូបមិនប្រកាន់និន្នាការ ឬសាសនាចង់បាន ពោលគឺឱកាសរស់នៅជួបជុំគ្រួសារក្នុងភាពសប្បាយរីករាយ ក្នុងបរិយាកាសសុខសន្តិភាព។ ហើយអ្វីដែលប្រជាពលរដ្ឋមិនចង់បាន គឺភាពវឹកវរ អសន្តិសុខ អស្ថិរភាព និងការបាត់បង់សន្តិភាព ដែលនាំអោយប្រទេសជាតិ និងប្រជាជនខ្មែរធ្លាក់ក្នុងភាពច្របូកច្របល់ បាត់បង់នូវសេចក្តីសុខ និងភាពកក់ក្តៅ។»
លោក ហ៊ុន ម៉ាណែត ក៏បានភ្ជាប់សារអំពាវនាវឱ្យមានការសហការគ្នាការពារសន្តិភាព ដើម្បីអនាគតរបស់ប្រទេសជាតិ និងប្រជាជនខ្មែរទាំងអស់។