ឯកអគ្គរដ្ឋទូតរបស់អាល្លឺម៉ង់នៅព្រឹកថ្ងៃអង្គារនេះ បានទៅសួរសុខទុក្ខលោក កឹម សុខា សាកសួរពីបញ្ហាសុខភាព និងបានពិភាក្សាពីការកសាងលទ្ធិប្រជាធិបតេយ្យ។
ក្រោយជំនួបជិត២ម៉ោងនៅព្រឹកនេះ លោក មុត ចន្ថា ប្រធានខុទ្ទកាល័យរបស់លោក កឹម សុខា ថ្លែងប្រាប់អ្នកសារព័ត៌មានថា ក្នុងជំនួបនោះផ្តោតសំខាន់លើបញ្ហាសុខភាព ហើយក៏មានការពិភាក្សាផ្លាស់ប្តូរយោបល់ពីដំណើរការលទ្ធិប្រជាធិបតេយ្យ។ លោក មុត ចន្តា៖
« បានជជែកគ្នាពីបញ្ហាសុខភាពរបស់ឯកឧត្តម កឹម សុខា ថាគាត់មានបញ្ហាសុខភាពយ៉ាងម៉េចហើយ? ហើយគាត់ត្រូវការបន្តព្យាបាលយ៉ាងម៉េច? ផ្លាស់ប្តូរយោបល់គ្នា សម្តែងមនោសញ្ចេតនាជាមួយគ្នា។ ហើយក៏បានពិភាក្សាពីបញ្ហាលទ្ធិប្រជាធិបតេយ្យនៅប្រទេសកម្ពុជា រួមគ្នាកសាងលទ្ធិប្រជាធិបតេយ្យទៅមុខទៀត និងផលប្រយោជន៍ដើម្បីពលរដ្ឋខ្មែរទូទៅ។»
ថ្ងៃនេះជាថ្ងៃទី២ហើយ ដែលលោក កឹម សុខា ជួបជាមួយតំណាងស្ថានទូត គឺកាលពីម្សិលមិញ លោកជួបជាមួយឯកអគ្គរដ្ឋទូតបារាំង និងឯកអគ្គរដ្ឋទូតរបស់សហរដ្ឋអាមេរិក។
