រោងចក្រកាត់ដេររបស់ថៅកែជនជាតិចិន ស្ថិតនៅក្នុងខណ្ឌដង្កោ ត្រូវបានអគ្គីភ័យលេបត្របាក់អស់ទាំងស្រុង នៅរសៀលថ្ងៃម្សិលមិញនេះ។
អធិការរងនគរបាលខណ្ឌដង្កោ លោក សូរ វិសាល បានឱ្យដឹងថា រោងចក្រកាត់ដេរ អេឃេ ភើហ្វមមេនស៍ (ខេមបូឌា) បានត្រូវភ្លើងឆាបឆេះនៅវេលាម៉ោង ១រសៀល ថ្ងៃទី១១ ខែវិច្ឆិកា ហើយលោកថា អគ្គិភ័យនេះកើតចេញពីការផ្ទុះធុងហ្គាស។
មន្ត្រីនគរបាលរូបនេះ បន្ថែមថា ឧប្បត្តិវហេតុនេះ មិនបានបង្កឱ្យបាត់បង់អាយុជីវិតមនុស្សអ្វីទេ ប៉ុន្តែ មានតែជនជាតិចិនម្នាក់រងរបួសដៃបន្តិចដោយសារផ្ទុះហ្គាស។
យោងតាមបញ្ជីពាណិជ្ជកម្មរបស់ក្រសួងពាណិជ្ជកម្ម រោងចក្រខាងលើនេះ មានថៅកែជាជនជាតិចិន ឈ្មោះ Zhou Jianjun មានទីតាំងស្ថិតនៅលើផ្លូវលេខ ២៥៦ ភូមិអន្លង់គង សង្កាត់ព្រៃសរ ខណ្ឌដង្កោ រាជធានីភ្នំពេញ និងបើកអាជីវកម្មផលិតអាវពោង និងកាបូប។
ប្រធានរដ្ឋបាលរបស់រោងចក្រ អេឃេ ភើហ្វមមេនស៍ លោក អ៊ុង គង់ហេង ឱ្យដឹងថា រោងចក្ររបស់លោកត្រូវបានអគ្គីភ័យបំផ្លាញអស់ទាំងស្រុង ប៉ុន្តែ មិនបានបង្កឱ្យរបួសស្នាមដល់កម្មករដែលមកធ្វើការថែមម៉ោងប្រមាណជាង ១០០នាក់នោះទេ។
លោកឱ្យដឹងបន្ថែមថា រោងចក្រដែលមានទំហំជាង ៧៣០០ម៉ែត្រការ៉េនេះ មានកម្មករសរុបជិត ៦០០នាក់។
កម្មករម្នាក់ដែលធ្វើការថែមម៉ោងនៅរោងចក្រ អេឃ្វេ ភើហ្វមមេនស៍ បានប្រាប់អ្នកយកព័ត៌មាន វីអូឌី ក្នុងលក្ខខណ្ឌមិនបញ្ចេញឈ្មោះ នៅកន្លែងកើតហេតុថា រោងចក្រដែលកញ្ញាកំពុងធ្វើការ មានកម្មករបម្រើការងារប្រមាណ ៧០០នាក់។ កញ្ញាបន្ថែមថា កញ្ញាបារម្ភពីភាពបាត់បង់ការងារធ្វើ ដោយសារតែរោងចក្រដែលខ្លួនកំពុងធ្វើការត្រូវបានអគ្គីភ័យឆាបឆេះអស់ដូច្នេះ៕
