ឧបនាយករដ្ឋមន្ត្រី លោក សខេង បានប្រកាសជាសារធារណៈថា មានលិខិតក្លែងក្លាយមួយត្រូវបានបង្ហោះតាមប្រព័ន្ធបណ្ដាញសង្គមហេ្វសប៊ុកក្នុងបំណងបំបែកបំបាក់ផ្ទៃក្នុងរបស់គណបក្សប្រជាជនកម្ពុជា។
លិខិតចំហរមួយច្បាប់អះអាងថា ខ្លួនជាសមាជិក CPP ខេត្តបាត់ដំបង ហើយលិខិតអនាមិកនោះសរសេរលិខិតផ្ញើទៅកាន់គណៈអចិន្ត្រៃយ៍គណបក្ស ដោយស្នើឱ្យផ្ទៃក្នុងបក្សកាន់អំណាចនេះដកសេចក្តីទុកចិត្តចំពោះប្រធានបក្ស និងជានាយករដ្ឋមន្ត្រី លោក ហ៊ុន សែន។
លោក ស ខេង មានប្រសាសន៍ថា លិខិតនោះជាលិខិតរបស់ក្រុមប្រឆាំងដែលប៉ុនប៉ងបំផ្លាញសេចក្តីសុខសន្តិភាពរបស់កម្ពុជា។
លោក ស ខេង មានប្រសាសន៍ថា៖ «លិខិតនោះ ដើម្បីធ្វើការបដិសេធរួចហើយ។ នេះគឺជាបំណងមិនល្អរបស់អ្នកប្រឆាំងទាំងនោះ ដើម្បីបំបែកបំបាក់ផ្ទៃក្នុងមកពីមជ្ឈដ្ឋានក្រុមប្រឆាំងហើយ។ ខ្ញុំបានឱ្យ គ៨៥(ស្នាក់ការកណ្ដាល CPP) និងគណបក្សបាត់ដំបង របស់គណបក្សប្រជាជន ដែលយើងប្រឆាំងដាច់ខាតមិនអាចទទួលយកបានទេ»។
គណបក្សប្រជាជនកម្ពុជាបានក្ដោបក្ដាប់អំណាចផ្តាច់មុខបន្ទាប់ពីឈ្នះកៅអីសភា ១២៥លើ១២៥អសនៈ ការបោះឆ្នោតជ្រើសតាំងតំណាងរាស្ត្រអាណិត្តទី៦ដោយគ្មានវត្តមានរបស់គណបក្សសង្គ្រោះជាតិ។ លោក ឧបនាយករដ្ឋមន្ត្រី ស ខេង ជាអនុប្រធានគណបក្សប្រជាជនកម្ពុជា ជាសមាជិកអចិន្ត្រៃយ៍គណបក្ស ជាប្រធានក្រុមការងារបក្សកាន់អំណាចខេត្តបាត់ដំបង ហើយក៏ជាមនុស្សមានអំណាចទី២ក្នុងរដ្ឋាភិបាលដឹកនាំដោយគណបក្សប្រជាជនកម្ពុជាបន្ទាប់លោកនាយករដ្ឋមន្ត្រី ហ៊ុន សែន៕
