លោក កឹម សុខា ក្រោយពេលជួបជាមួយឯកអគ្គរាជទូត និងរដ្ឋទូតមកពីប្រទេសកាន់របបប្រជាធិបតេយ្យមួយចំនួនមកបង្ហាញក្តីសង្ឃឹមថា នៅថ្ងៃខាងមុខកម្ពុជានឹងមានការផ្សះផ្សាជាតិ ហើយលើកមុខមាត់ប្រទេសលើឆាកអន្តរជាតិ។
នៅលើហ្វេសប៊ុកលោក កឹម សុខា កាលពីម្សិលមិញបញ្ជាក់ថា លោកមានការសប្បាយរីករាយដែលបានជួបជាមួយឯកអគ្គរាជទូត និង រដ្ឋទូតទាំងនេះ។
លោក កឹម សុខា៖ «ខ្ញុំមានសេចក្តីរីករាយណាស់ដែលប្រទេសដែលជាមិត្តរបស់កម្ពុជាតែងឈរជាមួយប្រជាពលរដ្ឋខ្មែរ និងលទ្ធិប្រជាធិបតេយ្យ។ ហើយខ្ញុំសង្ឃឹមថា តទៅថ្ងៃមុខកម្ពុជានឹងដើរទៅរកផ្លូវផ្សះផ្សាជាតិដែលនាំមកនូវអភិវឌ្ឍន៍ យុត្តិធម៌ និងសេរីភាពពេញលេញដល់ខ្មែរគ្រប់និន្នាការ និងលើកកម្ពស់មុខមាត់កម្ពុជានៅលើឆាកអន្តរជាតិ។»
កាលពីថ្ងៃទី១០ ខែវិច្ឆិកា តុលាការប្រកាសបន្ធូរបន្ថយលក្ខខណ្ឌដល់លោក កឹម សុខា ដែលអាចដើរចេញពីផ្ទះ និងអាចនិយាយជាមួយអ្នកសារព័ត៌មានបាន។
ក្រោយមកមួយថ្ងៃគឺចាប់ពីថ្ងៃទី១១ ដល់ថ្ងៃទី១៥ ឯកអគ្គរាជទូត និងរដ្ឋទូតចំនួន៧បានជួបសួរសុខទុក្ខ និងពិភាក្សាជាមួយលោក កឹម សុខា រួមាន តំណាងប្រទេសបារាំង សហរដ្ឋអាមេរិក អាល្លឺម៉ង់ អូស្ត្រាលី ជប៉ុន ចក្រភពអង់គ្លេស និងស្វីស។ ក្រៅទូតតំណាងឱ្យប្រទេសទាំង៧ក៏មានទូតតំណាងឱ្យសហភាពអឺរ៉ុបទៅជួបលោក កឹម សុខា ដែរ។