លោកនាយករដ្ឋមន្ត្រី ហ៊ុន សែន បញ្ជាទៅស្ថាប័នពាក់ព័ន្ធ ឱ្យចាត់វិធានការទប់ទល់ទៅនឹងអាកាសធាតុរាំងស្ងួត ខណៈមានការព្យាករថា កម្ពុជានឹងជួបអាកាសធាតុក្តៅខ្លាំងនៅពេលខាងមុខ។
សារាចរណែនាំចេញនៅថ្ងៃនេះ រដ្ឋាភិបាលលើកឡើងថា តាមការព្យាករ កម្ពុជាក៏ដូចជាប្រទេសក្នុងតំបន់ នឹងទទួលរងឥទ្ធិពលយ៉ាងធ្ងន់ធ្ងរពីបាតុភូត អែលនីណូ (El Nino)។
លោក ហ៊ុន សែន បន្តទៀតថា បាតុភូតនេះ នឹងបង្កឱ្យមានអាកាសធាតុក្តៅហួតហែងខ្លាំង រដូវវស្សាមកដល់យឺត របាយទឹកភ្លៀងមានភាពរអាក់រអួល របបទឹកទន្លេមេគង្គចុះដល់កម្រិតទាបមិនធ្លាប់ជួបប្រទះកន្លងមក។
លោក ហ៊ុន សែន បានណែនាំក្នុងសារចរនោះថា៖ «ស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ ត្រូវចូលរួមចាត់វិធានការថែរក្សាទឹកទុកឱ្យបានល្អ ដើម្បីផ្គត់ផ្គង់សម្រាប់តែការប្រើប្រាស់ប្រចាំថ្ងៃប៉ុណ្ណោះ រហូតមានភ្លៀងធ្លាក់ល្អប្រសើរឡើងវិញ»។
សេចក្តីណែនាំដដែលបញ្ជាក់ថា ការងារបង្កបង្កើនផលស្រូវប្រាំងក្នុងឆ្នាំ២០១៩-២០២០ អាចធ្វើបានតែ ១ដងប៉ុណ្ណោះ មិនអាចធ្វើស្រូវប្រាំងលើកទី២បានទេ។
សារាចរណែនាំនោះ លើកឡើងថា បើទោះបីជាទឹកនៅតាមបណ្តាអាងដែលបានរក្សាទុក និងកន្លែងមួយចំនួន មានទឹកធម្មជាតិក៏ដោយ គួរគប្បីរក្សាទឹកទាំងនោះទុកសម្រាប់ប្រើប្រាស់ប្រចាំថ្ងៃ និងការដាំដំណាំរួមផ្សំផ្សេងទៀតក្រៅពីស្រូវ។
រដ្ឋាភិបាលបានចេញសេចក្ដីណែនាំពីរឆ្នាំជាប់ៗគ្នាឱ្យថែរក្សាទឹកសម្រាប់ប្រើប្រាស់នារដូវប្រាំងហួតហែង ហើយលោកនាយករដ្ឋមន្ត្រី ហ៊ុន សែន កាលពីសប្ដាហ៍មុន ក៏បានថ្លែងជាសាធារណៈថា កម្ពុជាក៏នឹងប្រឈមមុខនឹងកង្វះខាតថាមពលប្រើប្រាស់ផងដែរនៅឆ្នាំនេះ ក៏ព្រោះតែកម្រិតសម្រាប់ផ្គត់ផ្គង់ទំនប់វារីអគ្គិសនី បានធ្លាក់ចុះទាបចាប់តាំងពីចុងឆ្នាំនេះរហូតដល់ខែឧសភាឆ្នាំក្រោយ៕
