ប្រធានាធិបតីសហរដ្ឋអាមេរិក លោក ដូណាស់ ត្រាំ បានក្រើនរំឭករដ្ឋាភិបាលកម្ពុជាថា ទំនាក់ទំនងល្អនៃប្រទេសទាំងពីរ គឺកម្ពុជាត្រូវវិលត្រលប់មករកមាគ៌ាប្រជាធិបតេយ្យវិញ ដើម្បីកុំឲ្យប្រទេសនេះធ្លាក់ក្នុងគ្រោះថ្នាក់ធ្ងន់ធ្ងរ។
លោក ដូណាល់ ត្រាំ ថ្លែងបែបនេះ ធ្វើឡើងតាមរយៈលិខិតមួយច្បាប់ចុះថ្ងៃទី១ ខែវិច្ឆិកា ដែលអាមេរិកផ្ញើជូននាយករដ្ឋមន្ត្រីកម្ពុជា លោក ហ៊ុន សែន ដែលVODទទួលបាននៅថ្ងៃនេះ។
លោក ត្រាំ បានលើកឡើងថា ក្នុងរយៈពេលប៉ុន្មានឆ្នាំកន្លងទៅថ្មីៗនេះ ទំនាក់ទំនងសហរដ្ឋអាមេរិកជាមួយកម្ពុជាបានពើបប្រទះនឹងការលំបាក ប៉ុន្តែលោកថា ភាពរកាំរកូសនេះមិនបម្រើប្រយោជន៍នៃប្រជាជនអាមេរិក និងកម្ពុជាទេ។
លោក ត្រាំ បញ្ជាក់ថា វាមានសារៈសំខាន់ណាស់ សម្រាប់អនាគតនៃទំនាក់ទំនងទ្វេភាគីដែលលោក ហ៊ុន សែន ត្រូវនាំកម្ពុជាត្រឡប់មករកមាគ៌ាអភិបាលកិច្ចតាមបែបប្រជាធិបតេយ្យវិញ។
លិខិតលោក ដូណាល់ ត្រាំ៖ «ជាជំហានដំបូង ខ្ញុំសង្ឃឹមថា សម្តេចនឹងពិនិត្យឡើងវិញនូវការសម្រេចមួយចំនួនដែលរដ្ឋាភិបាលសម្រេចប្រកាន់យក ហើយដែលការសម្រេចទាំងនោះ សហរដ្ឋអាមេរិកជឿជាក់មុតមាំថា វានឹងនាំឲ្យការអភិវឌ្ឍសេដ្ឋកិច្ច ស្ថិរភាព និងអធិបតេយ្យយូរអង្វែងរបស់ព្រះរាជាណាចក្រកម្ពុជា ធ្លាក់ក្នុងគ្រោះថ្នាក់ខ្លាំង»។
យ៉ាងនេះក្តី ប្រធានាធិបតីអាមេរិកអះអាងថា អាមេរិកគោរពឆន្ទៈអធិបតេយ្យរបស់ប្រជាជនកម្ពុជា ហើយសហរដ្ឋអាមេរិកមិនស្វែងរកឲ្យមានការប្តូររបបនោះទេ គឺផ្ទុយទៅវិញ រដ្ឋបាលសហរដ្ឋអាមេរិកស្វះស្វែងធ្វើឲ្យទំនាក់ទំនងជាមួយរដ្ឋាភិបាលកម្ពុជាដោយផ្អែកលើការគោរពគ្នាទៅវិញទៅមក។