តុលាការ នឹងប្រកាសសេចក្តីសម្រេចលើពាក្យសុំនៅក្រៅឃុំបណ្តោះអាសន្នរបស់យុវជន គង់ រ៉ៃយ៉ា នាថ្ងៃ២៩ ខែវិច្ឆិកាខាងមុខនេះ។ នេះបើតាមការបញ្ជាក់របស់លោកស្រីចៅក្រម អ៊ុក រ៉េតគន្ធា។
ក្រោយជាប់ឃុំប្រមាណជាងបួនខែក្នុងពន្ធនាគារ ក្រោមបទចោទ ញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សង្គម និងករណីមិនរៀងចាលក្នុងបទមជ្ឈឹម លោក គង់ រ៉ៃយ៉ា បានសម្រេចចិត្តដាក់ពាក្យសុំនៅក្រៅឃុំបណ្តោះអាសន្ន ដោយផ្អែកលើបញ្ហាសុខភាព និងមានភារៈរកប្រាក់ផ្គត់ផ្គង់គ្រួសារ។
លោក រ៉ៃយ៉ា បានបញ្ជាក់អំពីមូលហេតុដែលលោកដាក់ពាក្យស្នើសុំទៅតុលាការក្នុងសវនាការនាសាលាដំបូង រាជធានីភ្នំពេញ នៅរសៀលនេះថា លោកសុំនៅក្រៅឃុំផ្អែកលើហេតុផលសំខាន់ចំនួន៤។ លោកថា លោកមានបញ្ហាសុខភាពព្រោះជំងឺក្រពះធ្វើទុកខ្លាំង ហើយឈឺឆ្អឹងខ្នងទាមឱ្យមានការព្យាបាលទាន់ពេលដោយពេទ្យជំនាញ។ ក្រៅពីនេះ លោកបានលើកមូលហេតុថា លោកត្រូវបំពេញនាទីជាមេគ្រួសាររកប្រាក់ផ្គត់ផ្គង់ការព្យាបាលជំងឺរបស់ម្តាយជរា និងការរស់នៅរបស់ប្រពន្ធ ព្រមទាំងកូនស្រី និងចង់ទៅបន្តការសិក្សាថ្នាក់បរិញ្ញាប័ត្រនៅមហាវិទ្យាល័យ។
ចៅក្រមស៊ើបសួរនៃសាលាដំបូងរាជធានីភ្នំពេញបានបង្គាប់ឱ្យសមត្ថកិច្ចចាប់ខ្លួនលោក គង់ រ៉ៃយ៉ា ទៅឃុំនៅពន្ធនាគារព្រៃសបណ្តោះអាសន្ននាថ្ងៃទី១១ ខែកក្កដា ឆ្នាំ២០១៩ ក្រោមបទចោទ ញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សង្គម ក្រោយលោកប្រកាសលក់អាវយឺតមានរូបលោក កែម ឡី តាមបណ្តាញទំនាក់ទំនងសង្គមហ្វេសប៊ុក។ អាវនោះមានភ្ជាប់ជាមួយទ្រឹស្តីលោកបណ្ឌិត កែម ឡី ដោយសរសេរថា«បើអ្នកមិនធ្វើអ្វីសោះ ក៏គង់នឹងរងគ្រោះដែរ»។
យុវជន គង់ រ៉ៃយ៉ា ធ្លាប់ជាប់ពន្ធនាគារអស់រយៈពេលមួយឆ្នាំកន្លះម្តងរួចមកហើយ នាអំឡុងខែកុម្ភៈ ឆ្នាំ២០១៧ ព្រោះបង្ហោះសារលើបណ្តាញទំនាក់ទំនងសង្គមហ្វេសប៊ុកទាក់ទងនឹងបទចោទថា មានបំណងធ្វើបដិវត្តន៍ពណ៌៕