ស្នងការរាជធានីភ្នំពេញ លោក ស ថេត អះអាងថា សមត្ថកិច្ចកំពុងស្វែងរកជនសង្ស័យបីនាក់ ដែលស្ទាក់ប្លន់យកទ្រព្យសម្បត្តិពីស្ត្រីជនជាតិកូរ៉េម្នាក់តាមបណ្តោយផ្លូវជាសុផារ៉ាកាលពីយប់ថ្ងៃទី២៦ ខែវិច្ឆិកា។
លោក ស ថេត ប្រាប់វីអូឌីនៅថ្ងៃនេះថា សមត្ថកិច្ចបានទទួលពាក្យបណ្តឹងពីស្ត្រីជនជាតិកូរ៉េ ពាក់ព័ន្ធនឹងជនជាតិចិន៣នាក់ បើករថយន្តស្ទាក់ពេលស្រ្តីរូបនោះជិះរ៉ឺម៉ក់កង់បី តាមផ្លូវជាសុផារ៉ា ស្ថិតនៅសង្កាត់ច្រាំងចំរេះ២ ខណ្ឌឬស្សីកែវ។
ស្នងការរូបនោះអះអាងថា ក្រោយពីទទួលបានពាក្យបណ្តឹងពីជនរងគ្រោះ លោកបានចាត់មន្ត្រីជំនាញចុះស្រាវជ្រាវរកជនល្មើសមកផ្តន្ទាទោសតាមច្បាប់រួចហើយ។
យ៉ាងណាក៏ដោយ លោក ស ថេត បញ្ជាក់ថា រហូតមកដល់ថ្ងៃទី២៩ ខែវិច្ឆិកានេះ សមត្ថកិច្ចមិនទាន់ស្រាវជ្រាវឃើញតម្រុយជនសង្ស័យនៅឡើយ។
អ្នកបើករ៉ឺម៉ក់កង់បី បាននិយាយប្រាប់អ្នកសារព័ត៌មាននៅកន្លែងកើតហេតុថា មុនពេលកើតហេតុ លោកបានដឹកជនជាតិកូរ៉េនោះពីម្តុំអូឡាំពិក ឆ្ពោះទៅកាន់បុរីប៉េងហួត ផ្លូវជាសុផារ៉ា ស្ថិតនៅសង្កាត់ច្រាំងចំរេះ២ ខណ្ឌឬស្សីកែវ។ ប៉ុន្តែ នៅពេលធ្វើដំណើរទៅដល់ក្បែររបងផ្ទះលោក ជា សុផារ៉ា ត្រូវបានជនសង្ស័យចំនួន៣នាក់ដែលជាជនជាតិចិនជិះរថយន្តម៉ាកស្តារីច ស្ទាក់រ៉ឺម៉ក់របស់លោក ប្លន់យកទ្រព្យសម្បត្តិជនជាតិកូរ៉េនោះ រួចគេចខ្លួនបាត់៕