ក្រសួងមហាផ្ទៃ បដិសេធចំពោះការផ្សាយរបស់វិទ្យុអាស៊ីសេរីដែលថា លោក ស ខេង នៅតែបន្តបញ្ជាឲ្យតាមចាប់ខ្លួនអ្នកចូលរួមអមដំណើរ និងទទួលលោក សម រង្ស៊ី។
ក្នុងលិខិតមួយចុះថ្ងៃទី២ ខែធ្នូ ឆ្នាំ២០១៩ អ្នកនាំពាក្យក្រសួងមហាផ្ទៃលើកឡើងថា ក្នុងការផ្សាយព័ត៌មានជាវីដេអូរបស់វិទ្យុអាស៊ីសេរី កាលពីថ្ងៃទី២៩ ខែវិច្ឆិកា បានចោទប្រកាន់មិនត្រឹមត្រូវទៅលើរដ្ឋមន្ត្រីក្រសួងមហាផ្ទៃ ដោយថា លោក ស ខេង បានបញ្ជាទៅសមត្ថកិច្ចក្រោមឱវាទរបស់ខ្លួនតាមចាប់ខ្លួនរាល់មុខសញ្ញាអ្នកចូលរួមដំណើរ និងអ្នកទទួលដំណើរលោក សម រង្ស៊ី ដោយមិនរើសមុខ។
អ្នកនាំពាក្យក្រសួងមហាផ្ទៃ បន្តថា វិទ្យុអាស៊ីសេរីចុះផ្សាយចំណុចផ្សេងៗជាច្រើនទៀតអំពីលោក ស ខេង ហើយក្រសួងមហាផ្ទៃបានចាត់ទុកការផ្សាយរបស់វិទ្យុអាស៊ីសេរីបែបនេះ អាចនាំឲ្យសាធារណជនមានការយល់ច្រឡំលើការដឹកនាំរបស់លោក ស ខេង ។
អ្នកនាំពាក្យរូបនេះអះអាងថា កម្ពុជាជាប្រទេសប្រកាន់នីតិរដ្ឋ ដែលប្រជាពលរដ្ឋខ្មែរមានសេរីភាពខាងបញ្ចេញមតិរបស់ខ្លួន សេរីភាពខាងសារព័ត៌មាន និងសេរីភាពក្នុងការជួបប្រជុំ ជាដើម។ ប៉ុន្តែ ក្រសួងមហាផ្ទៃមិនឲ្យជនណាមួយឆ្លៀតឱកាសយកសិទ្ធិនេះទៅរំលោភលើសិទ្ធិអ្នកដទៃ ទំនៀមទម្លាប់ល្អរបស់សង្គម រួមទាំងសណ្តាប់ធ្នាប់សាធារណៈ និងសន្តិសុខសង្គមបានឡើយ។
អ្នកនាំពាក្យក្រសួងមហាផ្ទៃបានអំពាវនាវទៅវិទ្យុអាស៊ីសេរីឲ្យផ្សព្វផ្សាយព័ត៌មានពិតប្រកបដោយវិជ្ជាជីវៈ ថ្លៃថ្នូរ និងមានការទទួលខុសត្រូវខ្ពស់ ដើម្បីបម្រើផលប្រយោជន៍ដល់សង្គមជាតិ។
រហូតដល់ម៉ោងបីរសៀលថ្ងៃទី៣ ខែធ្នូនេះ វីអូឌី មិនទាន់ទទួលបានការឆ្លើយតបណាមួយពីលោក ជុន ចាន់បុត្រ អនុប្រធានវិទ្យុអាស៊ីសេរីជាខេមរភាសាបាននៅឡើយទេ។
វិទ្យុអាស៊ីសេរី ចាប់ផ្តើមផ្សាយជាភាសាខ្មែរតាំងពីឆ្នាំ១៩៩៧មកម្ល៉េះ ប៉ុន្តែ ស្ថាប័ននេះបានបិទការិយាល័យរបស់ខ្លួននៅរាជធានីភ្នំពេញ កាលពីថ្ងៃទី១២ ខែកញ្ញា ឆ្នាំ២០១៧។ កាលពីឆ្នាំ២០១៤ វិទ្យុនេះត្រូវបានដាក់ក្នុងបញ្ជីខ្មៅរបស់រដ្ឋាភិបាលដឹកនាំដោយគណបក្សប្រជាជនកម្ពុជា ដោយចោទថា ជាស្ថាប័នព័ត៌មានកាន់ជើងបក្សប្រឆាំង និងមានចេតនាអាក្រក់មកលើរដ្ឋាភិបាលកម្ពុជា។
ទោះយ៉ាងណាក៏ដោយ នាយកគ្រប់គ្រងការិយាល័យអាស៊ីសេរីប្រចាំនៅតំបន់អាស៊ីអាគ្នេយ៍ លោក Matthew Pennington បានជួបជជែកជាមួយរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ នៅរាជធានីភ្នំពេញ កាលពីថ្ងៃទី២២ ខែវិច្ឆិកា ឆ្នាំ២០១៩ អំពីការបើកការិយាល័យវិទ្យុអាស៊ីសេរីផ្សាយជាភាសាខ្មែរនៅក្នុងប្រទេសកម្ពុជាឡើងវិញ។ រដ្ឋមន្ត្រីក្រសួងព័ត៌មាន បានយល់ព្រម តែតម្រូវឱ្យវិទ្យុអាស៊ីសេរីសុំច្បាប់សុំអាជ្ញាប័ណ្ណពីក្រសួងព័ត៌មាន និងលុបចោលនូវការប្រើប្រាស់ពាក្យ «របបក្រុងភ្នំពេញ» ឬពាក្យ «របបលោក ហ៊ុន សែន» ចេញពីសេចក្ដីរាយការណ៍របស់ខ្លួន៕
