លោកនាយករដ្ឋមន្ត្រីហ៊ុន សែន បានប្រកាសថា ជំនួយពីសប្បុរសជនគឺគ្រប់គ្រាន់ហើយ សម្រាប់ធ្វើទំនើបកម្មដល់មន្ទីរពេទ្យកាល់ម៉ែត ដែលមានលទ្ធភាពពិនិត្យ និងព្យាបាលជំងឺសម្រាប់ប្រជាពលរដ្ឋកាន់តែមានប្រសិទ្ធភាពជាងមុន។
លោកនាយករដ្ឋមន្ត្រីហ៊ុន សែន បានប្រកាសលើហ្វេសប៊ុករបស់លោកកាលពីម្សិលមិញថា គិតត្រឹមព្រឹកថ្ងៃទី៦ខែធ្នូ ទឹកប្រាក់ដែលសប្បុរសជនជួយដល់មន្ទីរពេទ្យកាល់ម៉ែតតាមការអំពាវនាវរបស់លោកមានចំនួនជាង៧០លានដុល្លារ និងលុយខ្មែរមានជាង៣២លានរៀល។ លោកបន្តថា បូកថែមទាំងលុយរដ្ឋ៣០លានដុល្លារបន្ថែមទៀតគឺមានជាង១០០លានដុល្លារ មានលទ្ធភាពគ្រប់គ្រាន់សម្រាប់ធ្វើទំនើបកម្មមន្ទីរពេទ្យកាល់ម៉ែត។
លោក ហ៊ុន សែន៖«បើគិតទាំងថវិកា៣០លានដុល្លាររបស់រាជរដ្ឋាភិបាលផង
ចំនួនទឹកប្រាក់ឡើងដល់ជាង១០០លានដុល្លារដែលធ្វើឱ្យយើងមានលទ្ធភាព
រៀបចំមន្ទីរពេទ្យកាល់ម៉ែតឱ្យក្លាយទៅជាមជ្ឈមណ្ឌលពហុបច្ចេកទេស
សម្រាប់ការពិនិត្យព្យាបាលជូនប្រជាជន
យើងឱ្យកាន់តែមានប្រសិទ្ធភាព។»
កាលពីថ្ងៃទី២៤ខែវិច្ឆិកា លោកនាយករដ្ឋមន្ត្រីហ៊ុន សែន លើកឡើងថា ក្រោយពេលលោកទៅកំដរម្តាយក្មេកនៅក្នុងមន្ទីរពេទ្យកាល់ម៉ែត
គឺបានសង្កេតឃើញថា មន្ទីរពេទ្យនេះដើរតួនាទីសំខាន់សម្រាប់ពិនិត្យនិងព្យាបាលជំងឺជូនពលរដ្ឋ
ប៉ុន្តែខ្វះខាត។ លោកសម្រេចទម្លាក់លុយរដ្ឋ៣០លានដុល្លារដល់មន្ទីរពេទ្យនេះ
និងអំពាវនាវឱ្យសប្បុរសជនជួយ៕
