សម្ព័ន្ធអ្នកសារព័ត៌មានកម្ពុជាហៅកាត់«ខេមបូចា»ប្រកាសបើកដំណើរការស្ថាប័នរបស់ខ្លួន ដើម្បីជួយគាំទ្រដល់អ្នកសារព័ត៌មានឱ្យបំពេញការងាររបស់ខ្លួនដោយសេរី តាមវិជ្ជាជីវៈ និងមានគុណភាព ។
ក្នុងសេចក្ដីប្រកាសព័ត៌មានចុះថ្ងៃទី១១ ខែធ្នូ ឆ្នាំ២០១៩ របស់សម្ព័ន្ធអ្នកសារព័ត៌មានកម្ពុជា ហៅកាត់ «ខេមបូចា» ឱ្យដឹងថា ស្ថាប័ននេះនឹងរៀបចំពិធីសម្ពោធបើកដំណើរការសម្ព័ន្ធអ្នកសារព័ត៌មានកម្ពុជា ជាផ្លូវការ នាថ្ងៃទី១៣ ខែធ្នូ នៅសណ្ឋាគារហ៊ីម៉ាវ៉ារី។
សេចក្ដីប្រកាសដដែលថា ខេមបូចាបង្កើតឡើងដោយបណ្ដាញអ្នកសារព័ត៌មានដែលមានវិជ្ជាជីវៈ ឯករាជ្យ មិនមាននិន្នាការ ឬធ្វើសកម្មភាពលម្អៀងទៅគណបក្សនយោបាយណាមួយឡើយ។
ខេមបូចា៖ «ខេមបូចាត្រូវបានបង្កើតឡើង ក្នុងគោលបំណងលើកស្ទួយសេរីភាពសារព័ត៌មាន បង្កើនសមត្ថភាព ផ្ដល់មធ្យោបាយផ្ដល់ព័ត៌មាន និងការពារអ្នកសារព័ត៌មាន»។
នាយកប្រតិបត្តិខេមបូចា លោក ម៉ៃ ទិត្យថារ៉ា ថ្លែងថា ការបង្កើតខេមបូចាឡើង ដើម្បីផ្ដល់ការគាំទ្រដល់អ្នកសារព័ត៌មានក្នុងការបំពេញតួនាទី វិជ្ជាជីវៈរបស់ពួកគេដោយសេរី និងមានគុណភាព។
ក្រសួងព័ត៌មានបានសម្រេចចុះបញ្ជីជាផ្លូវការឱ្យសម្ព័ន្ធអ្នកសារព័ត៌មានកម្ពុជាហៅកាត់«ខេមបូចា»កាលពីថ្ងៃទី៩ ខែកញ្ញា ឆ្នាំ២០១៩ ។