ក្រសួងមហាផ្ទៃបង្កើតគណៈកម្មការមួយ ពង្រឹងប្រសិទ្ធភាពនៃការអនុវត្តគោលនយោបាយភូមិឃុំមានសុវត្ថិភាព ដោយស្វែងរកបុគ្គលមានស្នាដៃសម្រាប់ទទួលបានលិខិតសរសើរ។
ការសម្រេចបង្កើតស្ថាប័នថ្មីនេះ ត្រូវបានប្រកាសតាមរយៈសេចក្ដីសម្រេចចុះថ្ងៃទី៩ ខែធ្នូ ស្ដីពីការបង្កើតគណៈកម្មការរៀបចំសន្និបាតត្រួតពិនិត្យលទ្ធផលការងារឆ្នាំ២០១៩ និងលើកទិសដៅឆ្នាំ២០២០ សម្រាប់ការងារប្រឡងប្រណាំងអនុវត្តគោលនយោបាយភូមិឃុំមានសុវត្ថិភាព ដែលចុះហត្ថលេខាដោយរដ្ឋមន្ត្រីក្រសួងមហាផ្ទៃ លោក ស ខេង។
គណៈកម្មការនេះ មានលោក ស ខេង ជាប្រធាន និងរដ្ឋលេខាធិការក្រសួងនេះ គឺលោក សក់ សេដ្ឋា ជាអនុប្រធាន និងសមាសភាពមន្ត្រី ១០០នាក់ផ្សេងទៀត។
លោក ស ខេង ឱ្យដឹងតាមសេចក្ដីសម្រេចនេះថា គណៈកម្មការនេះមានភារកិច្ចតាមដានត្រួតពិនិត្យសកម្មភាពការងាររបស់ក្រុមប្រឹក្សាប្រឡងប្រណាំងគ្រប់លំដាប់ថ្នាក់ និងសម្រេចជ្រើសរើសបុគ្គល និងអង្គភាពដែលមានស្នាដៃឆ្នើមក្នុងចលនាប្រឡងប្រណាំងគោលនយោបាយភូមិឃុំមានសុវត្ថិភាព ដើម្បីផ្តល់លិខិតសរសើរគ្រឿងឥស្សរយសស្របតាមទំហំស្នាដៃ។
លោក ស ខេង ធ្លាប់អះអាងថា បញ្ហាគ្រឿងញៀន បានរាលដាលដល់ជនបទ និងកំពុងបំផ្លាញធនធានមនុស្ស បង្កបញ្ហាសង្គម ដែលលោកថា ត្រូវសហការរួមគ្នាទប់ស្កាត់ និងលុបបំបាត់ត្រឹមបំណាច់ឆ្នាំ២០១៩នេះ៕
