រដ្ឋបាលរាជធានីភ្នំពេញបានប្រកាសឱ្យអាជីវករមួយចំនួនដែលកំពុងលក់ដូរនៅជាន់ឡៅតឿ ស្ថិតនៅក្នុងផ្សារអូឫស្សី រើចេញទៅលក់នៅទីតាំងផ្សេងមួយរយៈ ដើម្បីជួសជុលផ្នែកប្រេះស្រាំ ចៀសវាងគ្រោះថ្នាក់ផ្សេងៗដែលអាចកើតមានឡើង។
នៅក្នុងសេចក្តីជូនដំណឹងរបស់សាលារាជធានីភ្នំពេញកាលពីម្សិលមិញបានឱ្យដឹងថា អគារផ្សារអូរឫស្សីទាំងស្រុងនៅរឹងមាំ ប៉ុន្តែ ដោយឡែកនៅជាន់ឡៅតឿមានការប្រេះស្រាំដែលអាចបង្កជាគ្រោះថ្នាក់ដល់អាជីវករ និងអតិថិជនដែលចូលទៅទិញទំនិញនៅទីនោះ។
សាលារាជធានីក៏បានអំពាវនាវឱ្យអាជីវករដែលលក់ដូរនៅជាន់ឡៅតឿ ដែលអាចប្រឈមគ្រោះថ្នាក់នោះដូរកន្លែងលក់ក្នុងរយៈពេលខ្លី។
សេចក្តីជូនដំណឹង៖ «ស្នើទៅបងប្អូនអាជីវករដែលកំពុងលក់ដូរនៅលើឡៅតឿ ក្រោមឡៅតឿ និងនៅជុំវិញបរិវេណទីតាំងនេះទាំងអស់ ផ្ទេរការលក់ដូរបណ្តោះអាសន្ននៅក្នុងរយៈពេលខ្លី»។
នៅក្នុងសេចក្តីជូនដំណឹងរបស់សាលារាជធានី មិនបានបញ្ជាក់ពីចំនួនតូបដែលត្រូវរើ និងត្រូវរើក្នុងរយៈពេលប៉ុន្មាននោះទេ៕